នាយករដ្ឋមន្រ្តីអាមេនីលោក Nikol Pashinyan និងប្រធានាធិបតីអាស៊ែបៃហ្សង់លោក Ilham Aliyev នឹងជួបគ្នានៅប្រទេសអារ៉ាប់រួមនាថ្ងៃព្រហស្បតិ៍នេះ ដើម្បីធ្វើការបញ្ចប់កិច្ចព្រមព្រៀងសន្តិភាព ក្រោយជម្លោះអស់រយៈពេលជិត ៤ទសវត្សរ៍ ។ នេះបើយោងតាមការអះអាងរបស់រដ្ឋាភិបាលប្រទេសទាំង ២ ។

ប្រទេសនៅតំបន់ South Caucasus ទាំង ២នេះ ឆ្លងកាត់សង្រ្គាមជាច្រើនលើកច្រើនសារ ចាប់តាំងពីចុងទសវត្សរ៍ឆ្នាំ ១៩៨០ រហូតមក ពេលដែលតំបន់ Nagorno-Karabakh ស្ថិតនៅក្នុងប្រទេសអាស៊ែបៃហ្សង់ ហើយកាលនោះមានជនជាតិដើមភាគតិចអាល់មេនីភាគច្រើនរស់នៅ បានផ្តាច់ខ្លួនចេញពីអាស៊ែបៃហ្សង់ ដោយមានការគាំទ្រពីអាមេនី ។

នៅក្នុងការទម្លុះភាពទាល់ច្រកដ៏សំខាន់មួយ ប្រទេសទាំង ២និយាយកាលពីខែមីនាថា ពួកគេបានបញ្ចប់កិច្ចព្រមព្រៀងសន្តិភាពស្នើច្បាប់ ប៉ុន្តែពេលវេលាចុះហត្ថលេខានៅមិនទាន់ច្បាស់ ហើយការបំពានបទឈប់បាញ់នៅតាមបណ្តោយព្រំដែន បានកើតមានឡើងក្រោយកិច្ចព្រមព្រៀងស្នើច្បាប់ ត្រូវបានប្រកាសឲ្យដឹង ។

ទោះបីជាយ៉ាងណាក៏ដោយ ពុំមានសេចក្តីរាយការណ៍ពីការបំពានបទឈប់បាញ់ទៀតនោះទេ ក្នុងរយៈពេលថ្មីៗនេះ ។

ជំនួបនៅក្នុងទីក្រុង Abu Dhabi នឹងក្លាយជាការជួបទល់មុខគ្នាផ្លូវការលើកដំបូងរបស់មេដឹកនាំទាំង ២ ចាប់តាំងពីពួកគេឯកភាពលើអត្ថបទស្នើច្បាប់នៃកិច្ចព្រមព្រៀងសន្តិភាព ។

ក្នុងដំណើរទស្សនកិច្ចដ៏កម្រទៅកាន់ប្រទេសទួរគីកាលពីខែមុន លោក Pashinyan បានជួបជាមួយលោកប្រធានាធិបតី Tayyip Erdogan ដែលនិយាយថា លោកនឹងគាំទ្រកិច្ចខិតខំប្រឹងប្រែងស្វែងរកសនិ្តភាពរបស់ទីក្រុង Yerevan ជាមួយទីក្រុង Baku ៕