អ្នកការទូតជាន់ខ្ពស់របស់សហភាពអឺរ៉ុប (EU) នៅថ្ងៃព្រហស្បតិ៍ (ទី១០ ខែកក្កដា) នេះ បានប្រាប់ឲ្យដឹងថា សហភាពអឺរ៉ុប បានឈានដល់កិច្ចព្រមព្រៀងជាមួយអ៊ីស្រាអែល ដើម្បីធ្វើឲ្យស្ថានភាពមនុស្សធម៌កាន់តែប្រសើរឡើង នៅតំបន់ហ្កាហ្សា។ 

តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ គឺលោកស្រី Kaja Kallas បានលើកឡើងថា កិច្ចព្រមព្រៀងនេះ មានរួមទាំងការបង្កើនរថយន្តដឹកទំនិញ សម្រាប់ជំនួយ និងការបើកច្រកឆ្លងកាត់ និងផ្លូវជំនួយមួយចំនួន។

លោកស្រី Kallas បានឲ្យដឹងនៅក្នុងសេចក្តីថ្លែងការណ៍ថា៖ «វិធានការទាំងនេះត្រូវបាន ឬនឹងត្រូវបានអនុវត្ត នៅប៉ុន្មានថ្ងៃខាងមុខនេះ ដោយមានការព្រមព្រៀងគ្នាថា ជំនួយក្នុងចំនួនដ៏ច្រើន ត្រូវតែត្រូវបានផ្តល់ដោយផ្ទាល់ដល់ប្រជាជន ហើយថា វិធានការនោះនឹងបន្តអនុវត្ត ដើម្បីធានាបានថា មិនមានការបង្វែរជំនួយដល់ក្រុមហាម៉ាស»។

គួរបញ្ជាក់ថា ការប្រកាសនេះត្រូវបានធ្វើឡើងក្នុងពេលដែលអន្តរជាតិដាក់សម្ពាធខ្លាំងឡើងៗឲ្យអ៊ីស្រាអែលសម្រាលស្ថានភាពមនុស្សធម៌ធ្ងន់ធ្ងរ នៅតំបន់ហ្កាហ្សា ដែលការខូចខាតហេដ្ឋារចនាសម្ព័ន្ធ កង្វះស្បៀងអាហារ និងវិបត្តិផ្គត់ផ្គង់ថ្នាំពេទ្យមានសភាពកាន់តែអាក្រក់ទៅៗក្នុងរយៈពេលដ៏យូរ៕