អ៊ុយក្រែនបានប្រាប់ឲ្យដឹងថា សមាជិកម្នាក់នៃទីភ្នាក់ងារសន្តិសុខរបស់ខ្លួន ត្រូវបានសម្លាប់នាថ្ងៃព្រហស្បតិ៍ (ទី១០ ខែកក្កដា) នេះ នៅកណ្តាលទីក្រុងគីវ ជាអ្វីដែលមើលទៅដូចជាការវាយប្រហារគោលដៅចុងក្រោយបំផុតលើបុគ្គលិកសន្តិសុខ គិតចាប់តាំងពីប្រទេសរុស្ស៊ីបានឈ្លានពាន។

ទីក្រុងមូស្គូបានចោទប្រកាន់ទីក្រុងគីវថា បានរៀបចំផែនការជាបន្តបន្ទាប់ ដើម្បីសម្លាប់មន្ត្រីយោធារុស្ស៊ី ឬអ្នកអត្ថាធិប្បាយគាំទ្រវិមានក្រឹមឡាំង ចាប់តាំងពីប្រធានាធិបតីរុស្ស៊ី លោក Vladimir Putin បានបញ្ជាឲ្យចាប់ផ្តើមការលុកលុយ កាលពីខែកុម្ភៈ ឆ្នាំ២០២២។ ការវាយប្រហារទាំងនោះត្រូវបានធ្វើឡើងទាំងនៅក្នុងដែនដីរបស់អ៊ុយក្រែនគ្រប់គ្រងដោយវិមានក្រឹមឡាំង និងលើដែនដីរុស្ស៊ី។

ទីភ្នាក់សន្តិសុខរបស់អ៊ុយក្រែន បានប្រាប់សារព័ត៌មាន AFP នៅក្នុងសេចក្តីថ្លែងការណ៍មួយថា៖ «ការស៊ើបអង្កេតឧក្រិដ្ឋកម្មមួយ ត្រូវបានចាប់ផ្តើមធ្វើឡើង ពាក់ព័ន្ធនឹងការសម្លាប់បុគ្គលិក SBU (ទីភ្នាក់ងារសន្តិសុខអ៊ុយក្រែន នៅតំបន់ Golosiivsky នៃទីក្រុងគីវ»។

ប្រព័ន្ធផ្សព្វផ្សាយអ៊ុយក្រែនបានបង្ហោះនូវអ្វីដែលមើលទៅដូចជារូបភាពក្នុងវីដេអូកាមេរ៉ាសុវត្ថិភាព ដែលបង្ហាញពីបុរសម្នាក់ដើរកាត់ចំណតរថយន្តដោយកាបូប ត្រូវបានវាយប្រហារដោយបុរសម្នាក់ទៀតដែលរត់សំដៅទៅជនរងគ្រោះ។ SBU មិនបានបង្ហាញអត្តសញ្ញាណអ្នកស្លាប់នៅក្នុងការវាយប្រហារនេះនោះទេ ហើយក៏មិនបញ្ជាក់ថា អាវុធប្រភេទណា ត្រូវបានប្រើប្រាស់នោះដែរ។

តែសារព័ត៌មានឯករាជ្យ Ukrainska Pravda បានរាយការណ៍ថា មន្ត្រី SBU ដែលត្រូវបានសម្លាប់ គឺលោកវរសេនីយ៍ឯក Ivan Voronych។ យោងតាមប្រភពពី SBU បានឲ្យដឹងថា ជនសង្ស័យបានបាញ់ចំនួន ៥គ្រាប់ទៅលើជនរងគ្រោះ ដោយកាំភ្លើងខ្លីមួយដើម៕