ប្រទេសកូរ៉េខាងត្បូង សហរដ្ឋអាមេរិក និងជប៉ុន កំពុងជួបពិភាក្សាគ្នា ដើម្បីប្រារព្ធកិច្ចប្រជុំ ៣ភាគី រវាងអ្នកការទូតជាន់ខ្ពស់នៃប្រទេសទាំង៣ នៅខាងក្រៅវេទិកាថ្នាក់រដ្ឋមន្ត្រី ដែលរៀបចំដោយសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) ដែលកំពុងដំណើរការនៅប្រទេសម៉ាឡេស៊ី។

យោងតាមប្រភពការទូត នៅថ្ងៃព្រហស្បតិ៍ (ទី១០ ខែកក្កដា) នេះ បានឲ្យដឹងថា ភាគីទាំង៣ កំពុងពិភាក្សា អំពីកិច្ចសន្ទនាត្រីភាគី ខណៈដែលវេទិកាដឹកនាំដោយអាស៊ាន គ្រោងនឹងបន្តមានរហូតដល់ថ្ងៃសុក្រ (ទី១១ ខែកក្កដា)។

ប្រសិនបើកិច្ចពិភាក្សាត្រូវបានធ្វើឡើង អនុរដ្ឋមន្ត្រីការបរទេសទី១ លោក Park Yoon-joo ត្រូវចូលរួមព្រឹត្តិការណ៍នេះតំណាងឲ្យរដ្ឋមន្ត្រី ដោយសារដំណើរការបញ្ជាក់អំពីបេក្ខភាពរបស់លោក Cho Hyun មិនទាន់ត្រូវបានបញ្ចប់សព្វគ្រប់។ លោក Park នឹងជួបជាមួយរដ្ឋមន្ត្រីការបរទេសអាមេរិក លោក Marco Rubio និងរដ្ឋមន្ត្រីការបរទេសជប៉ុន លោក Takeshi Iwaya។

បញ្ហាដែលមាននៅក្នុងរបៀបវារៈ រួមមានការសម្របសម្រួលត្រីភាគីប្រឆាំងនឹងការបង្កើនកិច្ចសហប្រតិបត្តិការយោធា រវាងកូរ៉េខាងជើង និងរុស្ស៊ី ក៏ដូចជាការចរចាពន្ធគយជាមួយរដ្ឋបាលរបស់លោក Donald Trump។ ជំនួបត្រីភាគីនេះ បើកើតឡើងនោះ នឹងក្លាយជាជំនួបលើកដំបូង គិតចាប់តាំងពីលោក Lee Jae Myung ចូលកាន់តំណែងនៅដើមខែមិថុនា៕