នៅថ្ងៃព្រហស្បតិ៍នេះ ជនប៉ាឡេស្ទីនគ្រោះថ្នាក់ ត្រូវបានបញ្ជូនទៅកាន់មន្ទីរពេទ្យ Al-Aqsa ស្ថិតក្នុងតំបន់ហ្កាហ្សា បន្ទាប់ពីការវាយប្រហាររបស់អ៊ីស្រាអែលលើតំបន់ Deir al-Balah បានសម្លាប់មនុស្សជាច្រើននាក់ ។

 គ្រូពេទ្យបានព្យាបាលអ្នកជំងឺរងរបួស រួមទាំងកុមារផងដែរ ដែលដេកដួលនៅលើដីក្នុងមន្ទីរពេទ្យ ខណៈជនប៉ាឡេស្ទីនស្រែកយំនៅក្បែរសាកសពមនុស្សជាទីស្រលាញ់របស់ពួកគេ ។

អ្នកស្រី Samah Al-Nouriដែលកូនស្រីរបស់អ្នកស្រីត្រូវបានសម្លាប់នៅក្នុងការវាយប្រហាររបស់អ៊ីស្រាអែល និយាយថា កូនស្រីរបស់គាត់បានទៅមណ្ឌលសុខភាព ដើម្បីព្យាបាលបំពង់ក. នាងគ្មានអ្វីនោះទេ នាងគ្រាន់តែទៅព្យាបាលនៅមណ្ឌលសុខភាពដែលពោពេញដោយក្មេងៗ ។ ពួកគេបានវាយប្រហារនាងដោយប្រើប្រាស់គ្រាប់កាំភ្លើងធំ បងប្រុសរបស់នាងក៏បានទៅព្យាបាលដែរ ហើយគាត់និយាយថា ពួកគេស្លាប់អស់ហើយ ។ តើពួកគេបានធ្វើអ្វីខុស? តើពួកគេមានកំហុសអ្វី? តើនាងខុសអ្វី? នាងគ្រាន់តែទៅរកការព្យាបាលប៉ុណ្ណោះ តើហេតុអ្វីបានជាពួកគេសម្លាប់នាងបែបនេះ? 

អ្នកស្រីនិយាយទៀតថា ព្រះអើយ វាគឺជាការសម្លាប់រង្គាល វាពិតណាស់ថាជាការសម្លាប់រង្គាល ។ តើព្រះអាចសងសឹកជំនួសពួកគេបានអត់? នាងពុំបានធ្វើអ្វីនោះទេ នាងគ្មានកំហុសនោះទេ អ្នកស្រីហ៊ានស្បថ ។ នាងនិយាយប្រាប់ខ្ញុំថា នាងចង់ហូបនំបុ័ង ៤-៥ដុំ នោះហើយជាក្តីស្រមៃរបស់នាង នាងចង់ឲ្យសង្រ្គាមបញ្ចប់ ហើយនាងចង់ត្រឡប់ទៅសាលារៀនវិញ តែពេលនេះ ក្តីស្រមៃរបស់នាង បានរលាយសាបសូន្យអស់ហើយ ៕