ក្រសួងការបរទេសអាមេរិក បាននិយាយថា រដ្ឋមន្ត្រីការបរទេសអាមេរិក លោក Marco Rubio នឹងជួបជាមួយរដ្ឋមន្ត្រីការបរទេសចិន លោក Wang Yi នៅទីក្រុងកូឡាឡាំពួរ នៅថ្ងៃសុក្រ ១១ កក្កដា នេះ នៅក្នុងអ្វីដែលនឹងក្លាយជាជំនួបដោយផ្ទាល់លើកដំបូងរបស់សមភាគីទាំងពីរ។

ប្រមុខការទូតរបស់ទីក្រុងវ៉ាស៊ីនតោនរូបនេះទៅដល់ម៉ាឡេស៊ី កាលពីថ្ងៃព្រហស្បតិ៍ ក្នុងដំណើរទស្សនកិច្ចលើកដំបូងរបស់លោកទៅកាន់អាស៊ីចាប់តាំងពីចូលកាន់តំណែងមក ជាទីដែលលោកបានចូលរួមជាមួយបណ្ដារដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលមានសមាជិក១០ប្រទេស នៅទីក្រុងកូឡាឡាំពួរ ហើយក៏បានជួបជាមួយមន្ត្រីជាន់ខ្ពស់ម៉ាឡេស៊ី និងសមភាគីរុស្ស៊ី លោក Sergei Lavrov ផងដែរ។

លោក Rubio កំពុងចូលរួមក្នុងកិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាននៅថ្ងៃសុក្រនេះ ដែលរួមមានជប៉ុន ចិន រុស្ស៊ី អូស្ត្រាលី ឥណ្ឌា សហភាពអឺរ៉ុប និងច្រើនទៀត។ ក្រុមអ្នកវិភាគនិយាយថា លោក Rubio នឹងសម្លឹងមើលលទ្ធភាពដែលសហរដ្ឋអាមេរិក នៅតែបន្តជាដៃគូល្អជាងប្រទេសចិន ដែលជាគូប្រជែងយុទ្ធសាស្ត្រសំខាន់របស់ទីក្រុងវ៉ាស៊ីនតោន ក្នុងអំឡុងពេលទស្សនកិច្ចអាស៊ីនេះ។

ជំនួបរបស់លោកជាមួយលោក Wang កើតឡើងស្របពេលមានភាពតានតឹងពាណិជ្ជកម្មកើនឡើង ដោយចិន ក្នុងសប្តាហ៍នេះ បានព្រមានអាមេរិក ប្រឆាំងនឹងការដំឡើងពន្ធដ៏ច្រើនលើទំនិញរបស់ខ្លួននៅខែក្រោយ។ ទីក្រុងប៉េកាំង ក៏បានគំរាមសងសឹកលើប្រទេសណាដែលធ្វើកិច្ចព្រមព្រៀងជាមួយសហរដ្ឋអាមេរិក ដែលប៉ះពាល់ដល់ប្រទេសចិន ក្នុងបណ្ដាញផ្គត់ផ្គង់៕