កូរ៉េខាងត្បូង ជប៉ុន និងសហរដ្ឋអាមេរិក បានធ្វើសមយុទ្ធដែនអាកាសរួមគ្នាមួយនៅថ្ងៃសុក្រ (១១ កក្កដា) នេះ ដែលពាក់ព័ន្ធនឹងយន្តហោះទម្លាក់គ្រាប់បែកយុទ្ធសាស្ត្រ B-52 របស់សហរដ្ឋអាមេរិក និងយន្តហោះចម្បាំងរបស់សម្ព័ន្ធមិត្តអាមេរិកទាំងពីរ នៅលើដែនទឹកអន្តរជាតិ នេះបើយោងតាមសារព័ត៌មាន Yonhap បានរាយការណ៍ដោយដកស្រង់សម្តីរបស់ក្រសួងការពារជាតិកូរ៉េខាងត្បូង។

យោងតាមតាមក្រសួងកូរ៉េខាងត្បូង សមយុទ្ធនេះធ្វើឡើងនៅលើដែនទឹកក្បែរកោះ Jeju ភាគខាងត្បូងកូរ៉េខាងត្បូង និងមានការចូលរួមពីយន្តហោះទម្លាក់គ្រាប់បែក B-52H របស់អាមេរិកយ៉ាងតិចមួយគ្រឿង ក៏ដូចជាយន្តហោះចម្បាំង KF-16 របស់កូរ៉េខាងត្បូង និងយន្តហោះចម្បាំង F-2 របស់ជប៉ុន។ ការហ្វឹកហ្វឺននេះជាការដាក់ពង្រាយដំបូងរបស់យន្តហោះទម្លាក់គ្រាប់ទៅឧបទ្វីបកូរ៉េក្នុងឆ្នាំនេះ។

ក្រសួងការពារជាតិដដែលនេះបាននិយាយក្នុងសេចក្តីថ្លែងការណ៍មួយថា ប្រមុខការពារជាតិនៃប្រទេសទាំងបីក៏បានបើកកិច្ចប្រជុំប្រចាំឆ្នាំនៅទីក្រុងសេអ៊ូល ក្នុងថ្ងៃសុក្រ ជាទីដែលក្រុមមន្រ្តីជាន់ខ្ពស់ទាំងបីរូបទទួលស្គាល់ពីសារៈសំខាន់នៃកិច្ចសហប្រតិបត្តិការត្រីភាគីយ៉ាងជិតស្និទ្ធក្នុងការដោះស្រាយបញ្ហាប្រឈមផ្នែកសន្តិសុខ ដែលបង្កឡើងដោយកូរ៉េខាងជើង នៅក្នុងតំបន់ឥណ្ឌូប៉ាស៊ីហ្វិក និងលើសពីនេះ។

លោក Dan Caine ប្រធានអគ្គសេនាធិការចម្រុះអាមេរិកបានថ្លែងក្នុងសុន្ទរកថាបើកមុនកិច្ចប្រជុំថា៖ "ភាគីទាំងបីកំពុងបំភ្លឺផ្លូវអនាគតរួមគ្នា ជាផ្លូវដែលភាពជាដៃគូអាចវិវឌ្ឍន៍តាមរយៈការចូលរួមជាប់លាប់ និងទៀងទាត់ ចាប់ពីការកសាងសមត្ថភាព រហូតដល់ការចែករំលែកការទទួលខុសត្រូវពិតប្រាកដ"៕