គ្រូពេទ្យម្នាក់ បាននិយាយកាលពីថ្ងៃព្រហស្បតិ៍ថា កងកម្លាំងយោធាប៉ារ៉ាគាំទ្ររហ័ស(RSF)របស់ប្រទេសស៊ូដង់ បានសម្លាប់ជនស៊ីវិល ៨នាក់ នៅក្នុងការវាយប្រហារទៅលើលេណដ្ឋានមួយ ដែលមនុស្សរាប់សិបនាក់កំពុងជ្រកកោន នៅក្នុងទីក្រុង El-Fasher ភាគខាងលិច ដែលត្រូវបានឡោមព័ទ្ធ។

ស្ទើរតែទាំងមូលនៃតំបន់ Darfur ជាតំបន់ភាគខាងលិចដ៏ធំនៃប្រទេសស៊ូដង់ នៅតែស្ថិតក្រោមការគ្រប់គ្រងរបស់កងកម្លាំង RSF ជាមួយនឹងការទំនាក់ទំនង និងប្រព័ន្ធផ្សព្វផ្សាយ ត្រូវបានកាត់ផ្តាច់ ចាប់តាំងពីសង្រ្គាមរបស់ RSF ជាមួយកងទ័ព បានចាប់ផ្តើម នៅក្នុងខែមេសា ឆ្នាំ ២០២៣។

ជម្លោះនេះ បានសម្លាប់មនុស្សរាប់ម៉ឺននាក់ បង្កជាវិបត្តិអត់ឃ្លាន និងការផ្លាស់ទីលំនៅដ៏ធំបំផុតរបស់ពិភពលោក និងបានបំផ្លិចបំផ្លាញប្រទេសអាហ្វ្រិកភាគឦសាន។



លោកវេជ្ជបណ្ឌិត បានប្រាប់សារព័ត៌មាន AFP ពីមន្ទីរពេទ្យ El-Fasher Teaching Hospital ដែលជាកន្លែងថែទាំសុខភាពចុងក្រោយរបស់ទីក្រុងនេះថា៖«កងកម្លាំងយោធាប៉ារ៉ាគាំទ្ររហ័ស(RSF) បានវាយប្រហារដោយយានដ្រូនលើទីជម្រកដែលប្រជាពលរដ្ឋបានជ្រកកោន កាលពីយប់ថ្ងៃអង្គារ»។

ពួកគេបាននិយាយក្នុងលក្ខខណ្ឌមិនបញ្ចេញឈ្មោះដើម្បីសុវត្ថិភាពរបស់ពួកគេ ខណៈដែលបុគ្គលិកសុខាភិបាល ត្រូវបានគេកំណត់គោលដៅម្តងហើយម្តងទៀត ដោយប្រើការភ្ជាប់អ៊ីនធឺណិតតាមផ្កាយរណប ដើម្បីជៀសវាងការដាច់ទំនាក់ទំនង។