ការសិក្សាស្រាវជ្រាវមួយ បានបង្ហាញកាលពីថ្ងៃពុធថា អាជ្ញាធររុស្ស៊ី បានរឹបអូសទ្រព្យសម្បត្តិដែលមានតម្លៃប្រហែល ៥០ពាន់លានដុល្លារ ក្នុងរយៈពេលបីឆ្នាំចុងក្រោយនេះ ដោយបញ្ជាក់ពីទំហំនៃការផ្លាស់ប្តូរទៅជាគំរូសេដ្ឋកិច្ចដ៏រឹងមាំរបស់រុស្ស៊ី» ក្នុងអំឡុងសង្គ្រាមនៅអ៊ុយក្រែន។

ជម្លោះនេះ ត្រូវបានអមដោយការផ្ទេរទ្រព្យសម្បតិ្តដ៏សំខាន់ៗ ខណៈដែលក្រុមហ៊ុនលោកខាងលិចជាច្រើនបានដកខ្លួនចេញពីទីផ្សាររុស្ស៊ី សម្ភារៈរបស់អ្នកផ្សេងទៀត ត្រូវបានដកហូត ហើយទ្រព្យសម្បត្តិរបស់អាជីវកម្មរុស្ស៊ីធំៗ មួយចំនួន ត្រូវបានរឹបអូសដោយរដ្ឋ។

ជាការឆ្លើយតបទៅនឹងអ្វីដែលរុស្ស៊ីហៅថា សកម្មភាពខុសច្បាប់របស់លោកខាងលិច លោកប្រធានាធិបតី វ្ល៉ាឌីមៀ ពូទីន បានចុះហត្ថលេខាលើក្រឹត្យជាច្រើន ក្នុងរយៈពេល ៣ឆ្នាំ ចុងក្រោយនេះ ដែលអនុញ្ញាតឲ្យ មានការរឹបអូសទ្រព្យសម្បត្តិរបស់លោកខាងលិច ដោយជ្រៀតជ្រែកក្រុមហ៊ុនជាច្រើន ចាប់ពីក្រុមហ៊ុន Uniper របស់អាល្លឺម៉ង់ រហូតដល់ក្រុមហ៊ុនស្រាបៀរ Carlsberg របស់ប្រទេសដាណឺម៉ាក។

ក្រៅពីទ្រព្យសម្បត្តិលោកខាងលិច ក្រុមហ៊ុនក្នុងស្រុកធំៗ បានផ្លាស់ប្តូរម្ចាស់ ដោយឈរលើមូលដ្ឋាន        នៃយន្តការផ្លូវច្បាប់ផ្សេងៗគ្នា ដែលក្នុងនោះមានតម្រូវការធនធានយុទ្ធសាស្ត្រ ការចោទប្រកាន់ពាក់ពន្ធ នឹងអំពើពុករលួយ ការរំលោភឯកជនភាវូបនីយកម្មដែលគេសង្ស័យ ឬការគ្រប់គ្រងមិនបានល្អ។