សារព័ត៌មាន The Times of Israel បានដកស្រង់សម្តីរដ្ឋមន្ត្រីការពារជាតិរបស់រដ្ឋជ្វីហ្វលោក Israel Katzដែលបាននិយាយថា អ៊ីស្រាអែលបានត្រៀមខ្លួនជាស្រេចក្នុងការវាយប្រហារឡើងវិញលើប្រទេស អ៊ីរ៉ង់«ដោយមានកម្លាំងខ្លាំងជាងនេះ»ប្រសិនបើគិតថា ចាំបាច់។ 

លោក Katz បាននិយាយនៅក្នុងពិធីបញ្ចប់វគ្គសិក្សារបស់អាកាសយានិករបស់កងទ័ពអាកាសអ៊ីស្រាអែលថា៖«ពិធីចែកសញ្ញាបត្រនេះ គឺជាសារផ្ទាល់ទៅកាន់មេដឹកនាំផ្តាច់ការលោក Ali Khamenei ៖ ដៃដ៏វែងរបស់អ៊ីស្រាអែល នឹងទៅដល់អ្នកនៅក្នុងទីក្រុងតេអេរ៉ង់ (Tehran), Tabriz, Isfahan និងគ្រប់ទីកន្លែងដែលអ្នកព្យាយាមគំរាមកំហែង និងធ្វើបាបអ៊ីស្រាអែល»។ «គ្មានកន្លែងណាដែលអ្នកអាចលាក់បានទេ។ ប្រសិនបើយើង ត្រូវការត្រឡប់ទៅវិញ យើងនឹងត្រឡប់ទៅវិញជាមួយនឹងការវាយប្រហារដោយកម្លាំងខ្លាំងជាងមុនទៅទៀត»។

នៅថ្ងៃទី ១៣ ខែមិថុនា អ៊ីស្រាអែលបានចាប់ផ្តើមយុទ្ធនាការយោធាប្រឆាំងនឹងអ៊ីរ៉ង់។ រយៈពេលតិចជាង ២៤ម៉ោង ក្រោយមក សាធារណរដ្ឋឥស្លាម បានធ្វើការវាយប្រហារសងសឹក។ សហរដ្ឋអាមេរិក បានចូលរួមក្នុងជម្លោះ រយៈពេល ៩ថ្ងៃ បន្ទាប់ពីការកើនឡើងភាពតានតឹងនោះ។ នៅព្រឹកព្រលឹមថ្ងៃទី ២២ ខែមិថុនា យន្តហោះទម្លាក់គ្រាប់បែកអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបី នៅក្នុងទីក្រុង Fordow, Natanz និង Isfahan។ នៅល្ងាចថ្ងៃទី២៣ មិថុនា ទីក្រុងតេអេរ៉ង់ បានបាញ់មីស៊ីលទៅលើមូលដ្ឋានយោធា Al-Udeid របស់សហរដ្ឋអាមេរិក នៅក្នុងប្រទេសកាតា។

បន្ទាប់ពីនោះមក ប្រធានាធិបតីអាមេរិក លោក ដូណាល់ ត្រាំ បាននិយាយថា អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់ពេញលេញ ដែលបានចូលជាធរមាន នៅថ្ងៃទី២៤ ខែមិថុនា។