រដ្ឋមន្ត្រីការបរទេសសហរដ្ឋអាមេរិក លោក Marco Rubio បានផ្តល់ព័ត៌មានទៅកាន់ភាគីរុស្ស៊ី ពីការខកចិត្តរបស់លោកប្រធានាធិបតី Donald Trump ចំពោះកង្វះវឌ្ឍនភាពក្នុងការចរចាបទឈប់បាញ់ជាមួយអ៊ុយក្រែន។ លោក Rubio បានជួបជាមួយរដ្ឋមន្ត្រីការបរទេសរុស្ស៊ី លោក Sergey Lavrov នៅទីក្រុង Kuala Lumpur ប្រទេសម៉ាឡេស៊ី កាលពីថ្ងៃព្រហស្បតិ៍នៅក្រៅកិច្ចប្រជុំថ្នាក់រដ្ឋមន្ត្រីការបរទេសអាស៊ានជាបន្តបន្ទាប់។

ថ្លែងទៅកាន់អ្នកសារព័ត៌មានបន្ទាប់ពីជំនួបជាមួយលោក Lavrov លោកRubio បាននិយាយថា ភាគីទាំងពីមានការសន្ទនាគ្នាដោយស្មោះត្រង់អំពីស្ថានភាពនៅអ៊ុយក្រែន។ លោក Rubio និយាយថា លោកបានប្រាប់លោក Lavrov ថា លោកប្រធានាធិបតី Trump «ខកចិត្ត ដែលពុំមានភាពបត់បែនបន្ថែមទៀតខាងភាគីរុស្ស៊ីក្នុងការបញ្ចប់ជម្លោះនេះ» ហើយសហរដ្ឋអាមេរិកសង្ឃឹមថានឹងអាចមានការផ្លាស់ប្តូរ។



លោក Rubio បាននិយាយថា លោក Lavrov បានបង្ហាញវិធីសាស្រ្តថ្មីនិងខុសប្លែក ឆ្ពោះទៅរកកិច្ចព្រមព្រៀងបទឈប់បាញ់ដែលអាចកើតមាន។ ប៉ុន្តែលោកពុំបានបញ្ចេញព័ត៌មានជាក់លាក់ណាមួយឡើយ។ កងកម្លាំងរុស្ស៊ី បាននិងកំពុងបង្កើនការវាយលុករបស់ខ្លួនលើទីក្រុងនានារបស់អ៊ុយក្រែន ខណៈរដ្ឋបាល លោក Trump បានប្រកាសកាលពីថ្ងៃអង្គារសប្តាហ៍នេះថា ខ្លួននឹងផ្តល់អាវុធការពារបន្ថែមទៀតសម្រាប់អ៊ុយក្រែន ហើយក៏កំពុងពិចារណាការដាក់ទណ្ឌកម្មបន្ថែមទៀតប្រឆាំងនឹងរុស្ស៊ី។