ឯកអគ្គរដ្ឋទូតអ៊ីរ៉ង់ប្រចាំនៅប្រទេសរុស្ស៊ី លោក Kazem Jalali បាននិយាយនៅក្នុងបទសម្ភាសន៍មួយជាមួយទីភ្នាក់ងារសារព័ត៌មាន TASS ថា ក្រុមបញ្ញវន្តរបស់អ៊ីរ៉ង់ នឹងបន្តការពារកម្មវិធីនុយក្លេអ៊ែររបស់ប្រទេសនេះ ជាសិទ្ធិស្របច្បាប់របស់ខ្លួន។

នៅពេលសួរថាតើទីក្រុងតេអេរ៉ង់ គ្រោងនឹងបន្តផលិតសារធាតុអ៊ុយរ៉ានីញ៉ូមឡើងវិញ ក្នុងរយៈពេលមធ្យមបន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែលដែរឬទេ អ្នកការទូតរូបនេះ បានឆ្លើយតបថា «ការឈ្លានពាននេះ បានពង្រឹងការប្តេជ្ញាចិត្តរបស់អ៊ីរ៉ង់ ក្នុងការកសាងអនាគតដ៏គួរឲ្យចង់បានសម្រាប់ប្រទេសនេះ ហើយនៅពេលយើងឆ្ពោះទៅរកគោលដៅនោះ ក្រុមបញ្ញាវន្ត និងអ្នកវិទ្យាសាស្ត្ររបស់យើងនឹងបន្តការពារកម្មវិធីនុយក្លេអ៊ែរយ៉ាងត្រឹមត្រូវ និងស្របច្បាប់»។

លោកឯកអគ្គរដ្ឋទូត បាននិយាយថា៖«សមត្ថភាពនុយក្លេអ៊ែររបស់អ៊ីរ៉ង់ គឺផ្ទៃក្នុង និងក្នុងស្រុក ដូច្នេះការខូចខាតដល់ហេដ្ឋារចនាសម្ព័ន្ធ នឹងមិនមានប្រសិទ្ធភាពទេ ពីព្រោះជំនាញនុយក្លេអ៊ែរ មិនអាចបំផ្លាញដោយការទម្លាក់គ្រាប់បែក និងមីស៊ីលបានទេ»។ «យើងមិនមាន និងពិតជាមិនមានការទាមទារណាមួយក្រៅពីការគោរពច្បាប់អន្តរជាតិនោះទេ»។

នៅថ្ងៃទី ១៣ ខែមិថុនា អ៊ីស្រាអែលបានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់។ រយៈពេលមិនដល់ មួយថ្ងៃក្រោយមក អ៊ីរ៉ង់បានធ្វើការវាយប្រហារសងសឹក។ រយៈពេល ៩ថ្ងៃ ក្រោយមក សហរដ្ឋអាមេរិក បានចូលរួមក្នុងជម្លោះនេះ។ នៅព្រឹកព្រលឹមថ្ងៃទី ២២ ខែមិថុនា កងកម្លាំងអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបីគឺ នៅក្នុងទីក្រុង Fordow, Natanz និង Isfahan។ នៅល្ងាចថ្ងៃទី ២៣ ខែមិថុនា ទីក្រុងតេអេរ៉ង់ បានវាយប្រហារដោយមីស៊ីលទៅលើមូលដ្ឋានយោធា Al Udeid ក្នុងប្រទេសកាតា ដែលជាមូលដ្ឋានទ័ពអាកាសដ៏ធំបំផុតរបស់សហរដ្ឋអាមេរិក នៅមជ្ឈិមបូព៌ា។ បើតាមសហរដ្ឋអាមេរិក មិនមានអ្នកស្លាប់ ឬខូចខាតអ្វីគួរឲ្យកត់សម្គាល់ទេ។ បន្ទាប់មក លោកប្រធានាធិបតី ដូណាល់ ត្រាំ បាននិយាយថា       អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់ ដែលបានចូលជាធរមាន នៅថ្ងៃទី ២៤ ខែមិថុនា។