រូម៉ានីបាននិយាយថា ខ្លួននឹងកសាងប្រព័ន្ធការពារមីស៊ីល Iron Dome ដែលអ៊ីស្រាអែលប្រើប្រាស់យ៉ាងមានប្រសិទ្ធិភាព ដើម្បីយកទៅការពារប្រទេសដែលនៅតាមបន្ទាត់ជួរមុខរបស់អង្គការណាតូមួយនេះពីមីស៊ីលរយៈចម្ងាយខ្លី។ រដ្ឋមន្ត្រីការពារជាតិ លោក Ionuț Moșteanu បានប្រាប់ទូរទស្សន៍មួយថា កិច្ចព្រមព្រៀងមួយនឹងត្រូវបានចុះហត្ថលេខានៅឆ្នាំនេះជាមួយក្រុមហ៊ុនផលិត Rafael "ដើម្បីការពារទីក្រុងរបស់រូម៉ានី"។

រូម៉ានីបានបង្កើនការប្រកាសអាសន្នជុំវិញការរីករាលដាលនៃយានដ្រូន និងមីស៊ីល ដែលបានធ្លាក់លើទឹកដីរបស់ខ្លួន ក្នុងអំឡុងពេលប្រតិបត្តិការយោធារបស់រុស្ស៊ី លើអ៊ុយក្រែន ដែលខ្លួនមានព្រំប្រទល់ជាប់ជិតខាង។ លោក Roger Hilton អ្នកស្រាវជ្រាវផ្នែកការពារជាតិមានមូលដ្ឋាននៅប្រទេសស្លូវ៉ាគី បានប្រាប់សារព័ត៌មាន Newsweek កាលពីថ្ងៃព្រហស្បតិ៍ (១០ កក្កដា) ថា ការបំពានផ្លូវអាកាសម្តងហើយម្តងទៀតពីយានដ្រូនរបស់រុស្ស៊ី នៅអ៊ុយក្រែន បានបង្ខំឱ្យរូម៉ានី អនុវត្តប្រព័ន្ធទប់ស្កាត់កាន់តែខ្លាំងក្លា។

គួររម្លឹកថា នៅក្នុងខែកញ្ញា ឆ្នាំ២០២៤ មានសេចក្ដីរាយការណ៍ថា កម្ទេចកម្ទីពីមីស៊ីល និងយានដ្រូនពីសង្គ្រាមនៅអ៊ុយក្រែន បានធ្លាក់នៅរូម៉ានី។ ប្រតិបត្តិការយោធាយ៉ាងពេញទំហឹងរបស់រុស្សី បានបង្កការភ្ញាក់ ផ្អើលក្នុងចំណោមសមាជិកអង្គការណាតូនៅអឺរ៉ុប ហើយទីក្រុងប៊ុយការ៉េស បានប្រុងប្រៀបយន្តហោះចម្បាំងជាបន្តបន្ទាប់ បន្ទាប់ពីយានដ្រូនបានរំលោភលើដែនអាកាសរបស់ខ្លួន។

ខណៈដែលពុំមានភស្តុតាងបញ្ជាក់ថារុស្ស៊ី មានចេតនាបាញ់អ្វីមួយចូលក្នុងប្រទេសណាតូនោះ ចំណាត់ការរបស់ទីក្រុងប៊ុយការ៉េសនៃប្រព័ន្ធការពារមីស៊ីល Iron Dome ថ្មីបានបង្ហាញពីការព្រួយបារម្ភអំពីការគំរាមកំហែងរបស់ទីក្រុងមូស្គូចំពោះសម្ព័ន្ធយោធា ដែលមាត្រាទី៥ នៃធម្មនុញ្ញរបស់ខ្លួនចែងថា ការវាយប្រហារលើសមាជិកណាតូម្នាក់គឺជាការវាយប្រហារលើទាំងអស់គ្នា៕