ក្រសួងសេដ្ឋកិច្ចអ៊ុយក្រែន បាននិយាយថា ទីក្រុងគីវ នឹងទទួលបានប្រាក់ចំនួន ២,៣ពាន់លានអឺរ៉ូពីគណៈកម្មការអឺរ៉ុប ក្រោមកម្មវិធីជំនួយហិរញ្ញវត្ថុរបស់សហភាពអឺរ៉ុបសម្រាប់អ៊ុយក្រែន។

ក្រសួងបានឲ្យដឹងនៅលើបណ្តាញសង្គមTelegramថា៖«កិច្ចព្រមព្រៀងថ្មីដែលមានតម្លៃ ២,៣ ពាន់លានអឺរ៉ូ ក្រោមកម្មវិធីជំនួយហិរញ្ញវត្ថុរបស់សហភាពអឺរ៉ុបសម្រាប់អ៊ុយក្រែននេះ ត្រូវបានចុះហត្ថលេខា នៅទីក្រុងរ៉ូមនៃប្រទេសអ៊ីតាលី។ ចំនួនទឹកប្រាក់នេះ រួមបញ្ចូលទាំងការធានាប្រាក់កម្ចីចំនួន ១,៨ពាន់លាន    អឺរ៉ូ ជំនួយឥតសំណងចំនួន ៥៨០លានអឺរ៉ូ និងហិរញ្ញប្បទានចម្រុះ»។  

ក្រសួងបានបញ្ជាក់ថា ជាផ្នែកមួយនៃកិច្ចព្រមព្រៀងនេះ ទីក្រុងគីវក៏រំពឹងថា នឹងមានការវិនិយោគបន្ថែមរហូត ដល់ដប់ពាន់លានអឺរ៉ូផងដែរ។

ក្រសួងបានបន្ថែមថា៖«ការចុះហត្ថលេខានេះ គឺជាលទ្ធផលនៃកិច្ចសហប្រតិបត្តិការជិតស្និទ្ធរវាងរដ្ឋាភិបាលអ៊ុយក្រែន គណៈកម្មការអឺរ៉ុប និងស្ថាប័នហិរញ្ញវត្ថុអន្តរជាតិឈានមុខគេ»។

មូលនិធិអ៊ឺរ៉ុបសម្រាប់ជំនួយដល់អ៊ុយក្រែន ត្រូវបានបង្កើតឡើង នៅថ្ងៃទី ០១ ខែមីនា ឆ្នាំ ២០២៤ និងផ្តល់ហិរញ្ញប្បទានដែលមានស្ថិរភាពរហូតដល់ ៥០ ពាន់លានអឺរ៉ូ ក្នុងទម្រង់ជាជំនួយ និងកម្ចី ដើម្បីគាំទ្រដល់ការស្តារឡើងវិញ ការកសាងឡើងវិញ និងទំនើបកម្មរបស់ប្រទេសនេះ ក្នុងរយៈពេលពីឆ្នាំ ២០២៤ ដល់ឆ្នាំ ២០២៧។