នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃព្រហស្បតិ៍ (ទី១០ ខែកក្កដា) បាននិយាយថា អ៊ីស្រាអែលត្រៀមខ្លួនជាស្រេច ក្នុងការចរចាកិច្ចព្រមព្រៀងយូរអង្វែងជាមួយក្រុមហាម៉ាស ដើម្បីបញ្ចប់សង្រ្គាម នៅតំបន់ហ្កាហ្សា នៅពេលដែលការផ្អាកបណ្តោះអាសន្ន ចំពោះអរិភាពនេះ ចាប់ផ្តើមមាន។

ប៉ុន្តែលោក Netanyahu បានបញ្ជាក់ថា ជាដំបូង ក្រុមសកម្មប្រយុទ្ធឥស្លាមមួយនេះ ត្រូវតែរំសាយអាវុធ និងបោះបង់ការកាន់កាប់របស់ពួកគេ នៅដែនដីប៉ាឡេស្ទីន ដោយព្រមានថា ការរណ៍ដែលមិនអាចឈានដល់កិច្ចព្រមព្រៀងតាមលក្ខខណ្ឌរបស់អ៊ីស្រាអែលទេនោះ នឹងនាំឲ្យមានជម្លោះបន្ថែមទៀត។

ការអត្ថាធិប្បាយរបស់លោកកើតមានឡើង ស្របពេលដែលទីភ្នាក់ងារការពារជនស៊ីវិលរបស់តំបន់ហ្កាហ្សា បានប្រាប់ឲ្យដឹងថា កុមារ ៨នាក់ដែលត្រូវបានសម្លាប់នៅពេលដែលពួកគេតម្រង់ជួរយកអាហារបំប៉ន នៅខាងក្រៅគ្លីនិកសុខភាព ស្ថិតក្នុងចំណោមអ្នកបាត់បង់ជីវិត ៦៦នាក់ អំឡុងការវាយប្រហាររបស់អ៊ីស្រាអែល នៅទូទាំងដែនដីនេះ កាលពីថ្ងៃទី១០ ខែកក្កដា។

កិច្ចប្រឹងប្រែង ដើម្បីធានាឲ្យបាននូវការផ្អាក ៦០ថ្ងៃ នៅក្នុងសង្រ្គាមរយៈពេល ២១ខែនេះ បានគ្របដណ្ដប់លើកិច្ចពិភាក្សារបស់លោក Netanyahu ជាមួយប្រធានាធិបតីអាមេរិក លោក Donald Trump ក្នុងទីក្រុងវ៉ាស៊ីនតោន។

ការចរចាដោយប្រយោល បាន និងកំពុងកើតឡើង រវាងភាគីទាំង២ នៅប្រទេសកាតា ហើយក្រុមសកម្មប្រយុទ្ធបានយល់ព្រមដោះលែងចំណាប់ថ្នូរចំនួន ១០នាក់ ក្នុងចំណោមអ្នកនៅរស់ ២០នាក់ដែលត្រូវបានឃុំខ្លួន ចាប់តាំងពីមានការវាយប្រហារកាលពីថ្ងៃទី៧ ខែតុលា ឆ្នាំ២០២៣ ជាហេតុការណ៍ដែលបង្កឲ្យផ្ទុះសង្រ្គាមដល់សព្វថ្ងៃ។ ចំណុចជាប់គាំងមួយចំនួន រួមមានការទាមទាររបស់ក្រុមហាម៉ាស ដើម្បីឲ្យមានលំហូរជំនួយដោយសេរីចូលតំបន់ហ្កាហ្សា និងការដកទ័ពរបស់អ៊ីស្រាអែលចេញពីដែនដីនេះ។ ហើយជាមួយគ្នានេះ ក្រុមនេះបានបញ្ជាក់ថា ខ្លួនក៏ចង់បាននូវ «ការធានាយ៉ាងពិតប្រាកដ» ឲ្យមានសន្តិភាពយូរអង្វែង។

តែលោក Netanyahu ដែលស្ថិតក្រោមសម្ពាធក្នុងស្រុក ដើម្បីឲ្យបញ្ចប់សង្រ្គាម ដោយសារការស្លាប់ និងរបួសផ្នែកយោធាកើនឡើង បានសង្កត់ធ្ងន់ថា ការរំសាយអាវុធ និងការរំលាយក្រុមហាម៉ាស គឺជា «លក្ខខណ្ឌមូលដ្ឋានដ៏ចាំបាច់» សម្រាប់អ៊ីស្រាអែល៕