នៅពេលដែលប្រធានាធិបតីអាមេរិកលោក Donald Trump បានយកការដំឡើងពន្ធ ៥០ភាគរយលើប្រទេសប្រេស៊ីលទៅពាក់ព័ន្ធនឹងការកាត់ក្តី ចំពោះសម្ព័ន្ធមិត្តរបស់លោក គឺអតីតមេដឹកនាំស្តាំនិយមជ្រុលរបស់ប្រទេសនេះ ទីក្រុងវ៉ាស៊ីនតោនបានធ្វើឲ្យប្រទេសសេដ្ឋកិច្ចដ៏ធំជាងគេបំផុតរបស់តំបន់អាមេរិកឡាទីនមួយនេះមានជម្រើសតិចតួច ក្នុងការទទួលបានការបន្ថយអត្រានេះ ប៉ុន្តែប្រហែលជាបានវាយតម្លៃខ្ពស់ជ្រុល ជុំវិញភាពងាយរងគ្រោះរបស់ប្រទេស ចំពោះកាតព្វកិច្ចពន្ធនេះ។

ប្រធានាធិបតីប្រេស៊ីល លោក Luiz Inacio Lula da Silva មិនមានទាំងឆន្ទៈនយោបាយ ឬអំណាចផ្លូវច្បាប់ ក្នុងការចូលទៅជ្រៀតជ្រែកក្នុងសំណុំរឿងប្រឆាំងនឹងអ្នកកាន់តំណែងមុនរបស់លោក គឺលោក Jair Bolsonaro ដែលប្រឈមនឹងការចោទប្រកាន់ពីបទរៀបចំរដ្ឋប្រហារ ក្រោយការបោះឆ្នោតដ៏ចម្រោងចម្រាសឆ្នាំ២០២២ ដែលលោក Lula ទទួលបានជ័យជម្នះ។

ប្រេស៊ីលស្ថិតក្នុងជំហររឹងមាំខ្លាំងជាងប្រទេសកំពុងអភិវឌ្ឍន៍ជាច្រើន ខណៈដែលមានការប៉ះពាល់ទាបលើពាណិជ្ជកម្មរបស់ប្រទេស ដោយសារវិធានការរបស់សហរដ្ឋអាមេរិកនេះ ហើយបើទោះបីជាអត្រាពន្ធខ្ពស់ក៏ដោយ ក៏សេដ្ឋកិច្ចនឹងនៅតែមិនសូវរងគ្រោះឡើយ។ មិនដូចប្រទេសភាគច្រើននៅលើពិភពលោកនោះទេ ជាក់ស្ដែង ប្រេស៊ីលមានឱនភាពពាណិជ្ជកម្មជាមួយសហរដ្ឋអាមេរិក។ សហរដ្ឋអាមេរិក ស្រូបយកប្រហែល ១២ភាគរយនៃការនាំចេញរបស់ប្រេស៊ីល ពោលគឺតិចជាងពាក់កណ្ដាលដែលចិនទិញ និងមានតម្លៃប្រហែល ១ភាគរយនៃ GDP (ផលិផលក្នុងស្រុកសរុប)។

ក្នុងលក្ខខណ្ឌមិនបញ្ចេញឈ្មោះ ដោយសារមិនត្រូវបានអនុញ្ញាតឲ្យនិយាយជាសាធារណៈ អំពីបញ្ហានេះ អ្នកការទូតប្រេស៊ីលម្នាក់ បានបង្ហើបឲ្យដឹងថា៖ «យើងនៅឆ្ងាយពីភាពងាយរងគ្រោះ មិនដូចប្រទេសផ្សេងទៀត ដោយសារប្រទេសទាំងនោះមានពាក់ព័ន្ធខ្លាំងជាមួយសហរដ្ឋអាមេរិក»៕