បាល់ទាត់៖ ក្លិបណាហ្គាវើលដ៏បានប្រកាសចែកផ្លូវជាមួយខ្សែប្រយុទ្ធប្រេស៊ីល និងជាម្ចាស់ស្បែកជើងមាសរដូវកាលឆ្នាំ២០២១ កីឡាករ Marcio Marques ហើយក្រោយរួមរស់ជាមួយគ្នាបាន ២រដូវកាលថ្មី។ Marcio គឺជាខ្សែប្រយុទ្ធស្នូលរបស់ក្រុមណាហ្គាវើលដ៏កាលពីរដូវកាលកន្លងទៅ ដោយគេបានរួមចំណែកជួយក្រុមច្រើនលើសមរភូមិវាលស្មៅ ខណៈពេញមួយរដូវកាល កីឡាករប្រេស៊ីលរូបនេះរកបាន ២២គ្រាប់ក្លាយជាម្ចាស់ស្បែកជើងមាស ក្នុងនាមកីឡាករស៊ុតបញ្ចូលទីបានច្រើនជាងគេទៀតផង។
Marcio គឺជាកីឡាករទី២ ហើយដែលក្លិបណាហ្គាវើលដ៏បានប្រកាសចែកផ្លូវ ក្រោយបញ្ចប់រដូវកាលឆ្នាំ២០២១ បន្ទាប់ពីខ្សែប្រយុទ្ធម៉ុលដាវី Leuca Petru ហើយបច្ចុប្បន្នក្រុមចំណាត់ថ្នាក់លេខ៤ នេះនៅមិនទាន់បង្ហាញសមាជិកថ្មីដើម្បីជំនួសតំណែងពួកគេ សម្រាប់ត្រៀមរដូវកាលថ្មីឆ្នាំ២០២២ នោះទេ។ ចំពោះអនាគតរបស់ខ្សែប្រយុទ្ធ Marcio ពេលនេះនៅមិនទាន់មានការប្រកាសជាផ្លូវការថា រូបគេនឹងទៅរួមរស់ជាមួយទ្រនំថ្មីនៅទីណានោះទេ។ ប៉ុន្ដែមានការឲ្យដឹងក្រៅផ្លូវកាថា រូបគេបានចុះកិច្ចព្រមព្រៀងជាមួយក្លិបលីគកំពូលវៀតណាម Nam Dinh FC រួចហើយ ពោលគឺមុនក្លិបណាហ្គាវើលដ៏ប្រកាសអំពីការចាកចេញកាលពីថ្មីៗ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
