ក្រោយលិខិតពន្ធពីប្រធានាធិបតីសហរដ្ឋអាមេរិកដែលគេជឿថា ជាការទទួលស្គាល់សាធារណៈលើកដំបូងរបស់ទីក្រុងវ៉ាស៊ីនតោនចំពោះការគ្រប់គ្រងយោធា របបសឹកមីយ៉ាន់ម៉ា និយាយនៅថ្ងៃសុក្រនេះថា មេដឹកនាំយោធាមីយ៉ាន់ម៉ាលោក Min Aung Hlaing បានកោតសរសើរលោក Donald Trump និងបានសុំលោកឲ្យដកចេញទណ្ឌកម្ម ។

លោក Aung Hlaing បានគាំទ្រអំណះអំណាងលោក Trumpថា ការបោះឆ្នោតសហរដ្ឋអាមេរិកឆ្នាំ ២០២០ ត្រូវបានគេលួច ហើយគាត់បានថ្លែងអំណរគុណលោកសម្រាប់ការបិទបញ្ចប់ការផ្តល់មូលនិធិដល់សារព័ត៌មានគាំទ្រដោយសហរដ្ឋអាមេរិក ក្នុងការផ្សព្វផ្សាយដោយឯករាជ្យពីមីយ៉ាន់ម៉ាដែលហែកហួរដោយសារជម្លោះ ។

យោធាបានទម្លាក់អំណាចរដ្ឋាភិបាលស៊ីវិលរបស់លោកស្រី Aung San Suu Kyiកាលពីឆ្នាំ ២០២១ បណ្តាលឲ្យប្រទេសមួយនេះ ធ្លាក់ផុងទៅក្នុងសង្រ្គាមស៊ីវិល ។

ក្រសួងការបរទេសសហរដ្ឋអាមេរិក បានដាក់ទណ្ឌកម្មមេដឹកនាំរបបសឹកមីយ៉ាន់ម៉ា និងក្រុមមន្រ្តីផ្សេងទៀត សម្រាប់ការប្រើប្រាស់អំពើហិង្សា និងអំពើភេរវកម្ម ដើម្បីគាបសង្កត់ពលរដ្ឋមីយ៉ាន់ម៉ា និងច្រានចោលលទ្ធភាពរបស់ពួកគេ ក្នុងការជ្រើសរើសដោយសេរីនូវមេដឹកនាំផ្ទាល់ខ្លួនរបស់ពួកគេ ។

ក្រុមមន្រ្តីការទូតសហរដ្ឋអាមេរិក ពុំបានចូលរួមផ្លូវការជាមួយរបបសឹកនោះឡើយ ប៉ុន្តែលោក Trumpបានផ្ញើរលិខិតទៅលោក Min Aung Hlaing តាមឈ្មោះ កាលពីចន្ទ ដោយនិយាយប្រាប់គាត់ថា សហរដ្ឋអាមេរិកនឹងទារពន្ធ ៤០ភាគរយ ចាប់ពីថ្ងៃទី ១ ខែសីហាតទៅ ពោលគឺធ្លាក់ចុះពីចំនួនពន្ធគំរាម ៤៤ភាគរយ ។

លោក Richard Horsey មកពីក្រុមវិបត្តិអន្តរជាតិ និយាយថា ច្បាស់ណាស់ថា វាគឺជាការចង្អុរបង្ហាញជាសាធារណៈលើកដំបូងដែលលោកបានមើលឃើញការទទួលស្គាល់របស់សហរដ្ឋអាមេរិកចំពោះលោក Min Aung Hlaing និងរបបសឹកមីយ៉ាន់ម៉ា ។

លោក Min Aung Hlaing បានក្តាប់យកឱកាសមួយនេះ ដើម្បីឆ្លើយតបវិញជាមួយលិខិតច្រើនទំព័រសរសេរជាភាសាមីយ៉ាន់ម៉ា និងភាសាអង់គ្លេសដោយក្រុមព័ត៌មានរបបសឹក នៅថ្ងៃសុក្រនេះ ៕