ការិយាល័យសិទ្ធិមនុស្សរបស់អង្គការសហប្រជាជាតិ (UN) នៅថ្ងៃសុក្រ (ទី១១ ខែកក្កដា) នេះ បានឲ្យដឹងថា ខ្លួនបានកត់ត្រាការសម្លាប់យ៉ាងហោចណាស់ ៧៩៨នាក់ ទាំងនៅចំណុចនៃទីតាំងផ្ដល់ជំនួយដំណើរការដោយមូលនិធិមនុស្សធម៌ហ្កាហ្សា (GHF) ដែលគាំទ្រដោយសហរដ្ឋអាមេរិក និងអ៊ីស្រាអែល និងទាំងនៅក្បែរក្បួនរថយន្តមនុស្សធម៌ដែលគ្រប់គ្រងដោយក្រុមសង្គ្រោះផ្សេងទៀត ក្នុងនោះមានរួមទាំង UN ផងដែរ។

GHF ប្រើប្រាស់ក្រុមហ៊ុនសន្តិសុខ និងភស្តុភារឯកជនរបស់សហរដ្ឋអាមេរិក ដើម្បីដឹកជញ្ជូនការផ្គត់ផ្គង់ចូលទៅកាន់តំបន់ហ្កាហ្សា ដោយភាគច្រើនរំលងប្រព័ន្ធដឹកនាំដោយ UN ដែលអ៊ីស្រាអែលលើកឡើងថា បានអនុញ្ញាតឲ្យក្រុមសកម្មប្រយុទ្ធបង្វែរជំនួយទាំងនោះទៅប្រើប្រាស់ខ្លួនឯង។ UN បានហៅផែនការនេះថា «គ្រោះថ្នាក់ខ្លាំងណាស់» និងជាការរំលោភលើច្បាប់មិនលម្អៀងផ្នែកមនុស្សធម៌។

អ្នកនាំពាក្យរបស់ OHCHR (ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស) លោកស្រី Ravina Shamdasani បានប្រាប់អ្នកសារព័ត៌មាននៅទីក្រុងហ្សឺណែវ ប្រទេសស្វីសថា៖ «រហូតដល់ថ្ងៃទី៧ ខែកក្កដា យើងបានកត់ត្រាចំនួនមនុស្សត្រូវបានសម្លាប់ ៧៩៨នាក់ ដែលរួមមាន ៦១៥នាក់ នៅជុំវិញតំបន់នៃទីតាំងមូលនិធិមនុស្សធម៌ហ្កាហ្សា ហើយ ១៨៣នាក់ ភាគច្រើននៅលើផ្លូវនៃក្បួនរថយន្តជំនួយ»។

GHF បានចាប់ផ្តើមចែកចាយកញ្ចប់អាហារ នៅតំបន់ហ្កាហ្សា កាលពីចុងខែឧសភា ហើយបានបដិសេធម្តងហើយម្តងទៀតថា ឧប្បត្តិហេតុទាំងនោះមិនបានកើតឡើងនៅកន្លែងរបស់ខ្លួនឡើយ៕