សាក្សីបានឲ្យដឹងថា យ៉ាងហោចណាស់មនុស្ស ២៣នាក់ ត្រូវបានបញ្ជាក់ថា ស្លាប់ ក្នុងមានរួមទាំងកុមារ ៤នាក់ផងដែរ បន្ទាប់ពីមានការវាយប្រហារលើវត្តអារាម ក្នុងតំបន់ Sagaing របស់សហភាពមីយ៉ាន់ម៉ា។

ប្រធានរដ្ឋបាលប្រជាជនតំបន់ Sagaing ដែលជាក្រុមគាំទ្រលទ្ធិប្រជាធិបតេយ្យ និងដែលគ្រប់គ្រងផ្នែកខ្លះនៃតំបន់ភាគកណ្តាល គឺលោក Hlaing Bwa បាននិយាយថា វត្តនៅក្នុងភូមិ Lintalu ត្រូវបានវាយប្រហារនៅព្រឹកព្រលឹមថ្ងៃសុក្រ (ទី១១ ខែកក្កដា) នេះ។ រូបលោក និងអ្នកស្រុកម្នាក់ទៀត បានពណ៌នាការវាយប្រហារនេះថា ជាការវាយប្រហារតាមអាកាសរបស់ក្រុមប្រឹក្សារដ្ឋបាលរដ្ឋ ដែលជារបបយោធាកាន់អំណាចរបស់មីយ៉ាន់ម៉ា។

លោក Hlaing Bwa បានប្រាប់សារព័ត៌មាន Reuters ថា វត្តនេះជាទីជម្រកនៃប្រជាជនប្រហែល ២០០នាក់ ដែលបានភៀសខ្លួនដោយសារការប្រយុទ្ធគ្នានៅក្បែរនោះ រវាងកងទ័ព និងកងកម្លាំងគាំទ្រលទ្ធិប្រជាធិបតេយ្យ។

ជាមួយគ្នានេះ អ្នកភូមិ Lintalu ឈ្មោះ Phoe Kaine ដែលរស់នៅជិតវត្តនោះ បានប្រាប់សារព័ត៌មាន Reuters ថា រួមជាមួយនឹងអ្នកស្លាប់ទាំង ២៣នាក់ មនុស្សជាច្រើននាក់ទៀតបានរងរបួសដោយសារការវាយប្រហារនេះ។

គួរបញ្ជាក់ថា សហភាពមីយ៉ាន់ម៉ាបានធ្លាក់ចូលក្នុងស្ថានភាពជម្លោះរ៉ាំរ៉ៃ ចាប់តាំងពីក្រុមយោធាបានបង្ក្រាបការតវ៉ាប្រឆាំងនឹងរដ្ឋប្រហារឆ្នាំ២០២១ ដែលបានទម្លាក់រដ្ឋាភិបាលជាប់ឆ្នោតដឹកនាំដោយម្ចាស់ជ័យលាភីពានរង្វាន់ណូបែល លោកស្រី Aung San Suu Kyi៕