ក្នុងទីក្រុង Kandahar ដែលខ្លោចដោយសារកម្តៅនៅប្រទេសអាហ្វហ្គានីស្ថាន រថយន្តតាក់ស៊ី ត្រូវបានគេប្រទះឃើញមានធុងបារ៉ែល និងបំពង់អាលុយមីញ៉ូមនៅលើដំបូលរបស់វា ។ ទាំងនេះ គឺជាម៉ាស៊ីនត្រជាក់ធ្វើដោយដៃដែលអ្នកបើកបររថយន្តតាក់ស៊ីបង្កើតឡើង ដើម្បីទប់ទាល់នឹងស្ថានភាពអាកាសធាតុក្តៅខ្លាំង ។

តាមធម្មតា សីតុណ្ហភាពនៅក្នុងទីក្រុងភាគខាងត្បូង Kandahar កើនឡើងដល់ ៤០អង្សាសេ ប៉ុន្តែបើសិនជាមានម៉ាស៊ីនត្រជាក់នៅក្នុងរថយន្ត នឹងធ្វើឲ្យសីតុណ្ហភាពធ្លាក់ចុះ ។

លោក Abdul Bari គឺជាអ្នកបើកបររថយន្តតាក់ស៊ីមួយរូប និយាយប្រាប់ទីភ្នាក់ងារព័ត៌មាន AFPថា ម៉ាស៊ីនត្រជាក់នេះ ដំណើរការល្អជាងម៉ាស៊ីនត្រជាក់ធម្មតាក្នុងរថយន្តទៅទៀត ។ ម៉ាស៊ីនត្រជាក់របស់រថយន្តត្រជាក់បានតែនៅផ្នែកខាងមុខប៉ុណ្ណោះ ប៉ុន្តែម៉ាស៊ីនត្រជាក់ឆ្នៃដោយដៃនេះ អាចត្រជាក់ពេញមួយរថយន្តតែម្តង ។

លោក Bari និយាយថា បញ្ហាតែមួយគត់ជាមួយម៉ាស៊ីនត្រជាក់ដំឡើងដោយខ្លួនឯងនេះ គឺត្រូវចាក់ទឹក ២លើកក្នុង ១ថ្ងៃ ប៉ុន្តែវាដំណើរការល្អខ្លាំងណាស់សម្រាប់រូបលោក ។

ស្ថិតក្នុងចំណោមប្រទេសក្រីក្របំផុតរបស់ពិភពលោក អាហ្វហ្គានីស្ថាន ស្ថិតក្នុងចំណោមប្រទេសងាយរងគ្រោះខ្លាំងបំផុតដោយសារផលប៉ះពាល់បង្កឡើងពីបម្រែបម្រួលអាកាសធាតុ ៕