រដ្ឋអាជ្ញាជាន់ខ្ពស់មួយរូបរបស់តុលាការព្រហ្មទណ្ឌកម្មអន្តរជាតិ(ICC) បានធ្វើការសន្និដ្ឋានថា មាននូវមូលដ្ឋានសមហេតុផលដែលគេជឿថា ឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ កំពុងប្រព្រឹត្តនៅតំបន់ភាគខាងលិច Darfur ប្រទេសស៊ូដង់ ដែលញាំញីដោយភ្លើងសង្រ្គាម ។

កាលពីថ្ងៃព្រហស្បតិ៍ម្សិលមិញ រដ្ឋអាជ្ញារងតុលាការ ICCលោកស្រី Nazhat Shameem Khan បង្ហាញការវាយតម្លៃរបស់លោកស្រី នៅមុខក្រុមប្រឹក្សាសន្តិសុខអង្គការសហប្រជាជាតិ(UN) ពីជម្លោះខ្ទេចខ្ទាំ ដែលបានផ្ទុះឡើងចាប់តាំងពីឆ្នាំ ២០២៣រហូតមក ដោយបានសម្លាប់មនុស្សជាង ៤ម៉ឺននាក់ និងមនុស្ស ១៣លាននាក់ផ្សេងទៀត ជម្លៀសខ្លួន ។

លោកស្រី Khan និយាយថា ជម្រៅនៃការរងគ្រោះ និងវិបត្តិមនុស្សធម៌នៅតំបន់ Darfur បានឈានដល់ស្ថានភាពលែងអាចអត់ឱនឲ្យបាន ក្នុងនោះ គ្រោះទុរ្ភិក្សកំពុងកើនឡើង ហើយមន្ទីរពេទ្យ ក្បួនរថយន្តមនុស្សធម៌ និងហេដ្ឋារចនាសម្ព័ន្ធស៊ីវិលផ្សេងទៀត បានក្លាយជាគោលដៅវាយប្រហារ ។

លោកស្រីបន្តថា វាពិបាករកពាក្យនិយាយត្រឹមត្រូវ ក្នុងការរៀបរាប់ពីជម្រៅនៃការរងគ្រោះនៅក្នុងតំបន់ Darfur ខ្លាំងណាស់ ។

លោកស្រីបញ្ជាក់ថា ផ្អែកលើមូលដ្ឋាននៃការស៊ើបអង្កេតឯករាជ្យរបស់ពួកយើង គោលជំហររបស់ការិយាល័យពួកយើងច្បាស់លាស់ខ្លាំងណាស់ ។ ពួកយើងមាននូវមូលដ្ឋានសមហេតុសមផលជឿថា ឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ បន្តប្រព្រឹត្តនៅក្នុងតំបន់ Darfur ។

លោកស្រីនិយាយទៀតថា ការិយាល័យរដ្ឋអាជ្ញារបស់ពួកយើង បានផ្តោតសំខាន់លើការស៊ើបអង្កេតឧក្រិដ្ឋកម្មដែលបានប្រព្រឹត្តនៅតំបន់ West Darfur ដោយពួកយើងបានធ្វើបទសម្ភាសន៍ជាមួយជនរងគ្រោះ រត់ភៀសខ្លួនទៅកាន់ប្រទេសជិតខាងឆាដ ៕