ប្រភពព័ត៌មានបាននិយាយកាលពីថ្ងៃសុក្រ ទី១១ កក្កដា ថា ការវាយប្រហារតាមអាកាសទៅលើវត្តពុទ្ធសាសនាមួយកន្លែងនៅតំបន់ Sagaing ភាគកណ្តាលរបស់សហភាពមីយ៉ាន់ម៉ាបានសម្លាប់មនុស្សយ៉ាងហោចណាស់២៣នាក់ដែលកំពុងស្នាក់ជាទីជម្រកនៅក្នុងបរិវេណវត្ត។

យោងតាមសមាជិកនៃក្រុមតស៊ូបាននិយាយថា ការវាយប្រហារតាមអាកាសកាលពីពេលយប់ទៅលើវត្តនៅក្នុងភូមិ Lin Ta Lu ក្នុងតំបន់ Sagaing បានបណ្តាលឱ្យមនុស្សប្រហែល៣០នាក់ផ្សេងទៀតរងរបួស ក្នុងនោះ១០នាក់ស្ថិតក្នុងស្ថានភាពធ្ងន់ធ្ងរ។

សមាជិកតស៊ូ បាននិយាយថាជនស៊ីវិល២៣នាក់រួមមានទាំងកុមារ៤នាក់ត្រូវបានសម្លាប់បន្ទាប់ពីយន្តហោះចម្បាំងមួយគ្រឿងបានទម្លាក់គ្រាប់បែកទៅលើអគារមួយជាវត្តពុទ្ធសាសនាក្នុងភូមិជាកន្លែងដែលមានមនុស្សជាង១៥០នាក់មកពីភូមិក្បែរនោះកំពុងជ្រកកោនដើម្បីគេចពីការប្រយុទ្ធគ្នានៅក្នុងតំបន់ក្នុង ប៉ុន្មានសប្តាហ៍ថ្មីៗនេះ។

យោធាពុំបានធ្វើអត្ថាធិប្បាយភ្លាមៗនោះទេអំពីឧបទ្ទវហេតុនៅវត្តដែលមានទីតាំងប្រហែល ៣៥ គីឡូម៉ែត្រភាគពាយព្យទីក្រុង Mandalay ជាទីក្រុងធំទីពីររបស់សហភាពមីយ៉ាន់ម៉ា។