ប្រធានាធិបតីលីបង់ លោក Joseph Aoun បានបញ្ជាក់កាលពីថ្ងៃសុក្រថា ការធ្វើប្រក្រតីភាពទំនាក់ទំនងការទូតជាមួយអ៊ីស្រាអែល បច្ចុប្បន្ននេះ គឺមិនត្រូវបានពិចារណានោះទេ ដោយបានសង្កត់ធ្ងន់ថា ការផ្តោតការយកចិត្តទុកដាក់នាពេលបច្ចុប្បន្នរបស់ប្រទេសលីបង់ គឺទៅលើការរក្សាសន្តិភាព មិនមែនការចូលទៅក្នុងទំនាក់ទំនងផ្លូវការនោះទេ។

លោកបាននិយាយថា៖ «សន្តិភាពមានន័យថា ជារដ្ឋមិនមានសង្គ្រាម ហើយនោះ គឺជាអ្វីដែលសំខាន់សម្រាប់ប្រទេសលីបង់នៅពេលនេះ»។ នេះបើយោងតាមសេចក្តីថ្លែងការណ៍ដែលចេញផ្សាយដោយការិយាល័យប្រធានាធិបតីលីបង់។ 

ការអត្ថាធិប្បាយរបស់លោក Aoun បានធ្វើឡើង ក្នុងកិច្ចប្រជុំជាមួយគណៈប្រតិភូមកពីក្រុមប្រឹក្សាទំនាក់ទំនងអារ៉ាប់ និងអន្តរជាតិ។

ក្នុងជំនួបនោះ លោក Aoun បានសង្កត់ធ្ងន់ថា ការរួបរួមរបស់ប្រជាជនលីបង់ គឺជាកត្តាសំខាន់ ក្នុងការយកឈ្នះលើបញ្ហាប្រឈម ដែលកំពុងបន្តរបស់ប្រទេសនេះ។

លោកថ្លែងថា៖«បើគ្មានឯកភាពជាតិទេ វានឹងមិនងាយប្រឈមមុខនឹងការលំបាក ដែលកើងឡើងនៅពេលខាងមុខនោះ។ លោកបានបញ្ជាក់ជាថ្មីថា រដ្ឋបានធ្វើការសម្រេចចិត្តមិនអាចកែប្រែបាន ក្នុងការធានាការកាន់កាប់អាវុធផ្តាច់មុខ ដោយអាជ្ញាធរស្របច្បាប់។