សន្និសិទស្តីពីការស្តារឡើងវិញអ៊ុយក្រែន រយៈពេលពីរថ្ងៃ បានបញ្ចប់នៅទីក្រុងរ៉ូមនៃប្រទេសអ៊ីតាលី កាលពីថ្ងៃសុក្រ ជាមួយនឹងក្តីសង្ឃឹមនៃការកសាងឡើងវិញភាគច្រើននៅតែមិនច្បាស់ ដោយសារតែខ្វះកិច្ចព្រមព្រៀងបទឈប់បាញ់។

សន្និសីទដែលរៀបចំដោយប្រទេសអ៊ីតាលី និងអ៊ុយក្រែន បានប្រមូលផ្តុំមន្ត្រីជាន់ខ្ពស់អឺរ៉ុប រួមទាំងប្រធានគណៈកម្មការអឺរ៉ុបលោកស្រី Ursula von der Leyen មេដឹកនាំមកពីប្រទេសអាល្លឺម៉ង់ ប៉ូឡូញ ក្រិក អាល់បានី និងបេសកជនពិសេសរបស់សហរដ្ឋអាមេរិក។

ថ្លែងនៅក្នុងសន្និសីទនេះ កាលពីថ្ងៃព្រហស្បតិ៍ ប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelensky) បានអំពាវនាវឲ្យសហគមន៍អន្តរជាតិដាក់ទណ្ឌកម្មកាន់តែតឹងរ៉ឹង លើប្រទេសរុស្ស៊ី និងបង្កើនការគាំទ្រសម្រាប់ការកសាងឡើងវិញ ក្រោយជម្លោះនៅអ៊ុយក្រែន។

កិច្ចប្រជុំនេះ បានធ្វើឡើង ចំពេលមានសេចក្តីរាយការណ៍ពីការវាយប្រហារដោយយានដ្រូន កាន់តែខ្លាំងលើទីក្រុងគីវ។ ដោយលើកឡើងពីការគំរាមកំហែងខាងយោធាដែលកំពុងកើនឡើង លោក ហ្សេឡិនស្គី បានសង្កត់ធ្ងន់លើតួនាទីនៃការវិនិយោគពីខាងក្រៅ ដោយពណ៌នាអំពី «ការបង្កើនការវិនិយោគ» ជាមធ្យោបាយ ដើម្បីបញ្ឈប់ការវាយប្រហារដោយយានដ្រូន និងមីស៊ីល។

កាលពីថ្ងៃពុធ លោក ហ្សេឡិនស្គី បានជួបជាមួយលោក Keith Kellogg បេសកជនពិសេសរបស់ប្រធានាធិបតីអាមេរិកលោក ដូណាល់ ត្រាំ( Donald Trump) នៅទីក្រុងរ៉ូម ដោយពិភាក្សាផ្តោតលើការផ្គត់ផ្គង់អាវុធ និងការពង្រឹងការការពារដែនអាកាស ខណៈដែលការវាយប្រហារដោយយានដ្រូន និងមីស៊ីល នៅតែបន្តមិនឈប់ឈរ។