ប្រធានាធិបតីសហរដ្ឋអាមេរិកលោក Donald Trump និយាយនៅក្នុងលិខិតបង្ហោះលើព័ត៌មានសង្គមរបស់លោកកាលពីថ្ងៃសៅរ៍ថា ទំនិញនាំចូលពីសហភាពអឺរ៉ុប(EU) និងម៉ិកស៊ិក នឹងប្រឈមអត្រាពន្ធសហរដ្ឋអាមេរិក ៣០ភាគរយ ចាប់ពីថ្ងៃទី ១ ខែសីហាតទៅ ។

លិខិតទាំង ២ដែលបានចុះកាលបរិច្ឆេតថ្ងៃទី ១១ ខែកក្កដា ប៉ុន្តែទើបបង្ហោះនៅថ្ងៃទី ១២ ខែកក្កដា ពន្យល់ពីហេតុផលរបស់លោកនៅពីក្រោយពន្ធ ដែលរួមទាំងការកែតម្រូវអ្វីដែលលោក Trumpបញ្ជាក់ថា ជាឱនភាពពាណិជ្ជកម្មជាមួយ EU និងការដាក់សំពាធលើប្រទេសម៉ិកស៊ិកឲ្យបញ្ឈប់លំហូរសារធាតុហ្វេនតានីល ចូលក្នុងសហរដ្ឋអាមេរិក ។

EU សង្ឃឹមថានឹងឈានដល់កិច្ចព្រមព្រៀងពាណិជ្ជកម្មគ្រប់ជ្រុងជ្រោយជាមួយសហរដ្ឋអាមេរិកសម្រាប់ប្លុក ២៧ប្រទេសមួយនេះ ។

នៅដើមសប្តាហ៍នេះដែរ លោក Trumpបានចេញសេចក្តីប្រកាសពន្ធថ្មីសម្រាប់ប្រទេសជាច្រើន រួមទាំងជប៉ុន កូរ៉េខាងត្បូង កាណាដា និងប្រេស៊ីល ក៏ដូចជាពន្ធ ៥០ភាគរយសម្រាប់ទង់ដែន ៕