បាល់ទាត់៖ យោងតាមប្រភពពីក្រុមហ៊ុនលីគបាល់ទាត់កម្ពុជាបានឲ្យដឹងថា ការប្រកួតលីគកំពូលកម្ពុជារដូវកាលថ្មីនឹងចាប់ផ្ដើមការប្រកួតនាថ្ងៃទី០៥ ខែមីនា ឆ្នាំ២០២២ ខាងមុខ ដោយមាន ៨ក្លិបចូលរួមបន្ទាប់ពីការធ្វើកំណែទម្រង់ស្ដង់ដារលីគ ខណៈក្លិបចំនួន ៥ ត្រូវបានកាត់ទៅលេងនៅលីគទី២។
ចំពោះក្លិបទាំង ៨ ដែលត្រូវបន្ដលេងក្របខណ្ឌលីគកំពូលរួមមានភ្នំពេញក្រោន ព្រះខ័នរាជស្វាយរៀង វិសាខា បឹងកេត ណាហ្គាវើលដ៏ អង្គរថាយហ្គឺរ កងយោធពលខេមរភូមិន្ទ និងក្រុមគិរីវង់សុខសែនជ័យ។ រីឯក្រុមត្រូវកាត់ចេញរួមមានក្រុមនគរបាលជាតិ អាស៊ីអឺរ៉ុប អគ្គិសនីកម្ពុជា ខេត្តព្រៃវែង និងសូលទីឡូអង្គរដែលត្រូវលេងលីគទី២ ជាមួយបេក្ខភាព ៧ក្រុមផ្សេងទៀតសរុប ១២ក្លិប។ ជុំវិញការសម្រេចក្លិបក្របខណ្ឌលីគលេងលីគកំពូល និងក្រុមត្រូវធ្លាក់ទៅលេងលីគទី២ នេះ បន្ទាប់ពីសហព័ន្ធកីឡាបាល់ទាត់កម្ពុជាបានបង្កើតក្រុមហ៊ុនលីគកាលពីថ្មីៗ ដែលដឹកនាំដោយនាយកប្រតិបត្តិជនជាតិជប៉ុនលោក Satoshi Saito ដើម្បីធ្វើទំនើបកម្មបាល់ទាត់សម័យទំនើប។ ទន្ទឹមជាមួយគ្នាក៏មានការប្រជុំជាច្រើនលើកជាមួយគ្រប់ភាគីពាក់ព័ន្ធ មុនឈានដល់ការសម្រេចនេះផងដែរ។
ប្រភពដដែលបន្ដថា ទោះបីបេក្ខភាពលីគកំពូលរដូវកាលថ្មីមានតែ ៨ក្រុមក្ដី តែចំនួនប្រកួតមិនចាញ់រដូវកាលចាស់នោះទេ ដោយក្រុមហ៊ុនគ្រោងនឹងរៀបចំការប្រកួតសន្សំពិន្ទុចំនួន ៣ជុំដែលស្មើនឹង ២១ប្រកួតក្នុងមួយក្រុម។ តាមរយៈនេះលោក Satoshi Saito មានសុទិដ្ឋិនិយមថា លីគឆ្នាំថ្មីនឹងមានការប្រកួតប្រជែងកាន់តែខ្លាំងជាងឆ្នាំមុន រួមជាមួយការប្រើលក្ខន្តិកៈថ្មីដើម្បីពង្រឹងស្ដង់ដារប្រកួតទៀតផង។ ចំណែកលីគទី២ ដែលមានបេក្ខភាពប្រកួតប្រជែងរហូតដល់ ១២ក្លិបវិញក៏នឹងត្រូវបានពង្រឹងដូចគ្នា ដ្បិតនាយកប្រតិបត្តិក្រុមហ៊ុនលីគចាត់ទុកលីគទី២ គឺជាផ្នែកដ៏សំខាន់របស់លីគកំពូលកម្ពុជា ពោលគឺជាគ្រួសារតែមួយដែលអាចត្រឡប់មកកាន់លីគកំពូលវិញ នារដូវកាលក្រោយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
