ក្រុមអ្នកស៊ើបអង្កេតគ្រោះថ្នាក់អាកាសចរណ៍ឥណ្ឌា កាលពីថ្ងៃសៅរ៍ (១២ កក្កដា) បានចេញផ្សាយរបាយការណ៍បឋមមួយអំពីគ្រោះថ្នាក់ធ្លាក់យន្តហោះប៊ូអ៊ីងរបស់ក្រុមហ៊ុនអាកាសចរណ៍ Air India ដ៏មហន្តរាយដែលសម្លាប់មនុស្សប្រមាណ ២៦០នាក់ កាលពីខែមុន ដោយបង្ហាញពីភាពច្របូកច្របល់នៅក្នុងបន្ទប់កាប៊ីនយន្តហោះ ភ្លាមៗមុនពេលគ្រោះថ្នាក់កើតឡើង បន្ទាប់ពីកុងតាក់ផ្តាច់ប្រេងម៉ាស៊ីនរបស់យន្តហោះ ត្រូវបានចុចស្ទើរតែដំណាលគ្នា និងផ្ដាច់សាំងមិនឱ្យហូរចូលម៉ាស៊ីន។

យន្តហោះប៊ូអ៊ីង 787 Dreamliner ដែលឆ្ពោះទៅទីក្រុងឡុងដ្រ៍ ពីទីក្រុង Ahmedabad របស់ឥណ្ឌា បានចាប់ផ្តើមបាត់បង់កម្លាំង និងធ្លាក់ចុះភ្លាមៗបន្ទាប់ពីការហោះហើរ នេះបើតាមរបាយការណ៍ស្តីពីគ្រោះថ្នាក់អាកាសចរណ៍ ដែលមានមនុស្សស្លាប់ច្រើនបំផុតក្នុងពិភពលោកក្នុងមួយទសវត្សរ៍មកនេះ។

របាយការណ៍របស់ការិយាល័យស៊ើបអង្កេតគ្រោះថ្នាក់យន្តហោះឥណ្ឌា (AAIB) អំពីគ្រោះថ្នាក់កាលពីថ្ងៃទី១២ ខែមិថុនា បង្កើតជាសំណួរថ្មីៗជុំវិញទីតាំងនៃកុងតាក់កាត់ផ្តាច់ប្រេងម៉ាស៊ីនដ៏សំខាន់។ ស្ទើរតែភ្លាមៗបន្ទាប់ពីយន្តហោះហោះឡើង កុងតាក់គ្រប់គ្រងប្រេងទាំងពីររបស់យន្តហោះ បានផ្លាស់ទៅមុខងារ "កាត់ផ្តាច់" ដោយហេតុនេះបានធ្វើឱ្យម៉ាស៊ីនពុំមានសាំង ហើយក៏ចាប់ផ្តើមបាត់បង់ថាមពល រួចក៏ធ្លាក់។

របាយការណ៍និយាយថា៖ «នៅក្នុងទិន្នន័យថតសំឡេងក្នុងកាប៊ីនយន្តហោះ អាកាសយានិកម្នាក់បានសួរម្នាក់ទៀតថា ហេតុអ្វីបានជាផ្ដាច់សាំង? អាកាសយានិកម្នាក់ទៀតឆ្លើយថា ខ្លួនមិនបានធ្វើដូច្នេះទេ»។ គេមិនអាចកំណត់បានឡើយថាឃ្លាណាជារបស់អាកាសយានិកទីមួយ និងមួយណានិយាយដោយសហពីឡុត ហើយក៏មិនច្បាស់ដែរថាតើអ្នកបើកកយន្តហោះរូបណាបានបញ្ជូនពាក្យ "ប្រកាសអាសន្ន" នៅមុនពេលធ្លាក់។ គួរឱ្យដឹងថា អ្នកបើកយន្តហោះទាំងពីររូបសុទ្ធតែមានបទពិសោធន៍ហោះហើរខ្ពស់។

របាយការណ៍បឋមនេះមិនបញ្ជាក់ទេថា តើកុងតាក់នោះអាចត្រឡប់ទៅមុខងារផ្ដាច់សាំងនៅពេលហោះហើរបានយ៉ាងដូចម្ដេច។ ក្រុមអ្នកជំនាញនិយាយថា អាកាសយានិកមិនអាចរំកិលកុងតាក់ផ្ដាច់ប្រេងនោះដោយចៃដន្យទេ។ ក្រុមហ៊ុនអាកាសចរណ៍ Air India បានទទួលស្គាល់របាយការណ៍នេះ ហើយថាខ្លួនកំពុងសហការជាមួយអាជ្ញាធរឥណ្ឌា ដោយបដិសេធការអត្ថាធិប្បាយបន្ថែមលើរឿងនេះ៕