ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន UNRWA បានព្រមានថា អ៊ីស្រាអែល កំពុងបង្កើតនូវ "គម្រោងដ៏ឃោរឃៅ និងព្រៃផ្សៃដើម្បីសម្លាប់មនុស្ស" នៅក្នុងតំបន់ហ្កាហ្សា ដោយចាប់តាំងពីខែឧសភាមក ប្រជាជនប៉ាឡេស្ទីនប្រហែល ៨០០នាក់ ត្រូវបានសម្លាប់ ក្នុងពេលកំពុងស្វែងរកជំនួយស្បៀងអាហារ។

ប្រធាន UNRWA លោក Philippe Lazzarini បាននិយាយក្នុងការបង្ហោះលើបណ្ដាញសង្គម X កាលពីថ្ងៃសុក្រ (១១ កក្កដា) ថា "នៅក្រោមការឃ្លាំមើលរបស់គ្រប់គ្នា តំបន់ហ្កាហ្សាបានប្រែក្លាយជាទីបញ្ចុះសពរបស់កុមារ និងពោរពេញដោយមនុស្សស្រេកឃ្លាន"។ លោកបន្តថា៖ "ប្រជាជនហ្កាហ្សា គ្មានច្រកចេញទេ ជម្រើសរបស់ពួកគេសុទ្ធតែជាការស្លាប់ ដោយភាពអត់ឃ្លាន ឬការត្រូវបានបាញ់សម្លាប់"។

ការអត្ថាធិប្បាយរបស់ប្រធានទីភ្នាក់ងារជំនួយប៉ាឡេស្ទីនរូបនេះបានកើតឡើងនៅថ្ងៃដ៏បង្ហូរឈាមមួយផ្សេងទៀតក្នុងតំបន់ហ្កាហ្សាស្ទ្រីប ជាមួយនឹងប្រភពវេជ្ជសាស្ត្ររាយការណ៍ថាមនុស្សរាប់សិបនាក់ត្រូវបានសម្លាប់ ក្នុងនោះការស្លាប់ជាច្រើនកើតឡើងនៅក្បែរមជ្ឈមណ្ឌលជំនួយ ដែលដំណើរការដោយមូលនិធិមនុស្សធម៌ហ្កាហ្សា GHF នៅក្រុង Rafah ភាគខាងត្បូង។

GHF ដែលគាំទ្រដោយសហរដ្ឋអាមេរិក និងអ៊ីស្រាអែលដ៏ចម្រូងចម្រាសនេះ បានបដិសេធយ៉ាងមានប្រសិទ្ធភាពចំពោះបណ្តាញផ្តល់ជំនួយធំៗដែលដឹកនាំដោយអង្គការសហប្រជាជាតិនៅដែនដីហ្កាហ្សា ចាប់តាំងពីខ្លួនចាប់ផ្តើមប្រតិបត្តិការនៅក្នុងខែឧសភាមក បន្ទាប់ពីអ៊ីស្រាអែលបានបន្ធូរបន្ថយការបិទផ្លូវទាំងស្រុងជាងពីរខែនៅលើដែនដីដ៏តូចចង្អៀតមួយនេះ៕