ប្រព័ន្ធផ្សព្វផ្សាយរដ្ឋរាយការណ៍ថា រដ្ឋមន្ត្រីការបរទេសអ៊ីរ៉ង់ បាននិយាយកាលពីថ្ងៃសៅរ៍ (១២ កក្កដា) ថា ទីក្រុងតេអេរ៉ង់នឹងទទួលយកការបន្តកិច្ចចរចានុយក្លេអ៊ែរជាមួយសហរដ្ឋអាមេរិក ប្រសិនបើមានការធានាមិនឱ្យមានការវាយប្រហារលើប្រទេសនេះម្ដងទៀត។

រដ្ឋមន្ត្រីការបរទេស លោក Abbas Araghchi បាននិយាយនៅក្នុងសុន្ទរកថាទៅកាន់អ្នកការទូតបរទេសមានមូលដ្ឋាននៅទីក្រុងតេអេរ៉ង់ថា អ៊ីរ៉ង់តែងតែត្រៀមខ្លួនរួចជាស្រេច ហើយនឹងត្រៀមខ្លួននៅពេលអនាគតសម្រាប់ការពិភាក្សាអំពីកម្មវិធីនុយក្លេអ៊ែររបស់ខ្លួន ប៉ុន្តែ "ការធានាគួរតែត្រូវបានផ្តល់ឱ្យថាក្នុងករណីនៃការចរចាឡើងវិញ ជំហាននេះនឹងមិននាំឱ្យមានសង្គ្រាមម្ដងទៀតទេ"។

ដោយសំដៅទៅលើការទម្លាក់គ្រាប់បែករបស់អ៊ីស្រាអែល រយៈពេល ១២ថ្ងៃទៅលើទីតាំងនុយក្លេអ៊ែរ និងយោធារបស់អ៊ីរ៉ង់ និងការវាយប្រហាររបស់អាមេរិក នៅថ្ងៃទី២២ ខែមិថុនា លោក Araghchi បាននិយាយថា ប្រសិនបើក្រុងវ៉ាស៊ីនតោន និងប្រទេសដទៃទៀតចង់បន្តកិច្ចចរចាជាមួយអ៊ីរ៉ង់ឡើងវិញ “ជាដំបូង គួរតែមានការធានាយ៉ាងម៉ឺងម៉ាត់ថា សកម្មភាពយោធាបែបនេះនឹងមិនកើតឡើងម្តងទៀត"។ 

អ៊ីស្រាអែលអះអាងថា ខ្លួនធ្វើសកម្មភាពនេះដោយសារតែក្រុងតេអេរ៉ង់ ជិតទទួលបានអាវុធនុយក្លេអ៊ែរហើយ។ ទីភ្នាក់ងារចារកម្មសម្ងាត់អាមេរិក និងទីភ្នាក់ងារថាមពលអាតូមិកអន្តរជាតិ IAEA បានវាយតម្លៃថា អ៊ីរ៉ង់មានកម្មវិធីអាវុធនុយក្លេអ៊ែរចុងក្រោយបំផុតគឺក្នុងឆ្នាំ២០០៣ ហើយទីក្រុងតេអេរ៉ង់ បាននិងបន្តបង្កើនសារធាតុអ៊ុយរ៉ានីញ៉ូមដល់ទៅ ៦០% — ដែលជាជំហានបច្ចេកទេសខ្លីមួយខិតជិតដល់កម្រិត ៩០% ដែលត្រូវការសម្រាប់អាវុធនុយក្លេអ៊ែរ៕