របាយការណ៍ថ្មីមួយរបស់អង្គការឧតុនិយមពិភពលោក (WMO) របស់អង្គការសហប្រជាជាតិ បានរកឃើញថា ព្យុះខ្សាច់ និងព្យុះធូលី កំពុងតែនាំឱ្យមាន "ការស្លាប់មុនអាយុ" ដោយសារបម្រែបម្រួលអាកាសធាតុដ៏ធ្ងន់ធ្ងរ ដែលមានមនុស្សជាង ៣៣០លាននាក់ក្នុង ១៥០ប្រទេស បានរងផលប៉ះពាល់។

អគ្គលេខាធិការ WMO លោកស្រី Celeste Saulo បាននិយាយកាលពីថ្ងៃព្រហស្បតិ៍សប្ដាហ៍នេះក្នុងមហាសន្និបាតអង្គការសហប្រជាជាតិUNGA ថា ព្យុះខ្សាច់ និងធូលី មិនមែនគ្រាន់តែមានន័យថា “បង្អួចកខ្វក់ និងផ្ទៃមេឃអាប់អួរនោះទេ ប៉ុន្តែព្រឹត្តិការណ៍ទាំងនេះប៉ះពាល់ដល់សុខភាព និងគុណភាពជីវិតរបស់មនុស្សរាប់លាននាក់ ហើយត្រូវចំណាយអស់រាប់លានដុល្លារ តាមរយៈការរំខានដល់ការដឹកជញ្ជូនតាមផ្លូវអាកាស និងដីគោក លើវិស័យកសិកម្ម និងការផលិតថាមពលពន្លឺព្រះអាទិត្យ"។

ប្រធានមហាសន្និបាតអង្គការសហប្រជាជាតិ លោក Philemon Yang បាននិយាយថា ភាគល្អិតខ្យល់ពីព្យុះទាំងនេះរួមចំណែកដល់ការស្លាប់មុនអាយុចំនួន ៧លាននាក់ ជារៀងរាល់ឆ្នាំ ដោយបន្ថែមថា ព្យុះក៏បង្កជំងឺផ្លូវដង្ហើម និងសរសៃឈាមបេះដូង និងកាត់បន្ថយទិន្នផលដំណាំរហូតដល់ ២៥% ដែលបង្កឱ្យមានភាពអត់ឃ្លាន និងការធ្វើអន្តោប្រវេសន៍ចាកចេញពីប្រទេសកំណើត។

លោកស្រី Laura Paterson តំណាងអង្គការសហប្រជាជាតិរបស់ WMO បានប្រាប់ UNGA ថា "ប្រហែល ២ពាន់លានតោននៃធូលីត្រូវបានបញ្ចេញជារៀងរាល់ឆ្នាំ ស្មើនឹងទំហំ ៣០០ដងនៃពីរ៉ាមីត Giza របស់អេហ្ស៊ីប។ លោកស្រី Paterson បន្ថែមថា ជាង ៨០% នៃធូលីរបស់ពិភពលោកបានមកពីវាលខ្សាច់នៅអាហ្វ្រិកខាងជើង និងមជ្ឈិមបូព៌ា ប៉ុន្តែព្រឹត្តិការណ៍នេះមានឥទ្ធិពលជាសកល ដោយសារតែភាគល្អិតអាចធ្វើដំណើរបានរាប់រយ និងរាប់ពាន់គីឡូម៉ែត្រឆ្លងកាត់ទ្វីប និងមហាសមុទ្រ៕