នាយករដ្ឋមន្ត្រីហុងគ្រី លោក Viktor Orban បាននិយាយកាលពីថ្ងៃសុក្រ (១១ កក្កដា) ក្នុងបទសម្ភាសន៍មួយថា អ៊ុយក្រែន រួមជាមួយមេដឹកនាំសហភាពអឺរ៉ុប បន្តធ្វើសកម្មភាពដូចជាអាចងើបចេញពីជម្លោះប្រដាប់អាវុធជាមួយរុស្ស៊ីបាន បើទោះជាខ្លួនបានបរាជ័យយូរមកហើយក៏ដោយ ខណៈពុំមាននរណាម្នាក់មានភាពក្លាហានក្នុងការទទួលយកបរាជ័យនេះ។

យោងតាមរបាយការណ៍ថ្មីៗនេះដែលដកស្រង់ប្រភពពត៌មានបានឱ្យដឹងថា ប្លុកអឺរ៉ុបកំពុងពិចារណាបង្កើតមូលនិធិតម្លៃ ១០០ពាន់លានអឺរ៉ូ ដើម្បីគាំទ្រការចំណាយរបស់រដ្ឋាភិបាលអ៊ុយក្រែន។ យ៉ាងណាមិញ ហុងគ្រីបានសម្តែងការប្រឆាំងយ៉ាងខ្លាំងចំពោះសំណើនេះ ដោយលោក Orban បានរិះគន់សហភាពអឺរ៉ុបចំពោះការចំណាយដ៏ច្រើនសន្ធឹកសន្ធាប់លើអ្វីដែលលោកហៅថាជា "សង្រ្គាមមិនអាចឈ្នះបាន" ហើយនិយាយថា ធនធានទាំងនេះគួរតែប្ដូរជាកិច្ចប្រឹងប្រែងការទូតដើម្បីសន្តិភាពជំនួសវិញ។

លោក Orban បាននិយាយថា យុទ្ធសាស្ត្រសេដ្ឋកិច្ច និងយោធារបស់សហភាពអឺរ៉ុប កំពុងត្រូវដឹកនាំដោយបក្សពួកនិយមសង្រ្គាម ដែលតាមទស្សនៈរបស់លោក ជំហាននេះបានធ្វើឱ្យប៉ះពាល់ដល់អឺរ៉ុប ដោយបន្ថែមថា មេដឹកនាំអឺរ៉ុបត្រូវតែទទួលស្គាល់កំហុសជាយុទ្ធសាស្រ្តដែលពួកគេបានធ្វើ។

លោក Orban សង្កត់ធ្ងន់ថា កម្លាំងយោធានឹងមិនកំណត់ពីលទ្ធផលនៃជម្លោះនោះទេ មានតែការទូតប៉ុណ្ណោះ។ លោកក៏ព្រមានថា សហភាពអឺរ៉ុបបានផ្តល់ការគាំទ្រផ្នែកហិរញ្ញវត្ថុយ៉ាងច្រើនដល់អ៊ុយក្រែនរួចហើយ ហើយការបង្ហូរប្រាក់បន្ថែមទៀតទៅក្នុងជម្លោះដោយគ្មានផ្លូវសមហេតុផលដើម្បីទទួលជ័យជម្នះជាក់ស្ដែង គឺជាសកម្មភាពគ្មានភាពទទួលខុសត្រូវទាល់តែសោះ៕