ឧត្ដរមានជ័យ ៖ ពិតជាខ្លាំងដូចឈ្មោះមែន...! ឈ្មួញឈើឈ្មោះ ម៉ៅ សារ៉េត រហស្សនាម«មហាទេពស្មើមេឃ» និងប្រពន្ធ ដឹកជញ្ជូនឈើសិប្បកម្មគ្មានច្បាប់ យ៉ាងសកម្មប្រចាំស្រុកត្រពាំងប្រាសាទ អត់ដែលឃើញសមត្ថកិច្ចគ្រប់ជំនាញបង្ក្រាបបានម្ដងឡើយ។
សេចក្ដីរាយការណ៍ បានឲ្យដឹងថា មេឈ្មួញជើងខ្លាំងប្រចាំស្រុកត្រពាំងប្រាសាទ ខេត្តឧត្ដរមានជ័យ ឈ្មោះ ម៉ៅ សារ៉េត និង ប្រពន្ធ ជាឈ្មួញរកស៊ីដឹកឈើសិប្បកម្មគ្មានច្បាប់ កំពុងចរាចរ ជាងដប់ឆ្នាំមកហើយ មកដល់ពេលនេះ ។
ជាក់ស្ដែង នៅយប់ថ្ងៃទី ២៦ ឈានចូលថ្ងៃទី ២៧ ខែសីហា ឆ្នាំ២០១៨ មានរថយន្ដម៉ាក វីហ្គោ ពណ៌ត្រេអ៊ី និងរថយន្ដម៉ាក តាកូម៉ា ពណ៌ស ដែលបើកបរដោយ «មហាទេពស្មើមេឃ» ផ្ទាល់ និងកូនចៅ បានធ្វើការដឹកជញ្ជូនឈើសិប្បកម្មចេញពីចំណុចស្រុកត្រពាំងប្រាសាទ ខេត្តឧត្ដរមានជ័យ ឆ្លងកាត់ស្រុកអន្លង់វែង ឆ្ពោះទៅ ខេត្តបន្ទាយមានជ័យ និងខេត្តនានាដោយរលូន អាជ្ញាធរមូលដ្ឋាន សមត្ថកិច្ច និងមន្ត្រីជំនាញគ្រប់ផ្នែក មិនដែលឃើញទប់ស្កាត់ ឬបង្ក្រាបនោះទេ ។
ការរកស៊ីដឹកឈើសិប្បកម្មគ្មានច្បាប់ដោយមិនមានការរាំងស្ទះបែបនេះ ត្រូវមតិមហាជន និយាយថា ប្រហែលជា លោក ម៉ៅ សារ៉េត «មហាទេពស្មើមេឃ» និងប្រពន្ធ ចេះសែនព្រេនឲ្យ ទេវតា អារុក្ខអារក្ខ អ្នកតាប្រចាំការ នៅតំបន់រាល់ខែហើយ ទើបបានជាមិនដែលឃើញ ចុះចាប់បង្ក្រាបសូម្បីតែម្ដងណាក៏គ្មានសោះអញ្ចឹង? សូម្បីតែ លោក ជៀល សុផល មេសង្កាត់រដ្ឋបាល ព្រៃឈើប្រចាំស្រុក ត្រពាំងប្រាសាទ ក៏គ្មានចំណាត់ការចំពោះមេឈ្មួញជើងខ្លាំងពីរនាក់ប្តី-ប្រពន្ធរូបនេះដែរ ?។
មហាជន រស់នៅស្រុកត្រពាំងប្រាសាទ និងស្រុកអន្លង់វែង ខេត្តឧត្ដរមានជ័យ បាននិយាយថា លោក ជៀល សុផល មេសង្កាត់រដ្ឋបាលព្រៃ គាត់មានសមត្ថភាព ចាប់ឈើប្រជាជនដឹកតូចតាចតែប៉ុណ្ណោះ ។ ចំណែកឯកឈ្មួញធំៗ បែរ ជាអសមត្ថភាពក្នុងការបង្ក្រាបទៅវិញ សង្ស័យថា ឈ្មោះម៉ៅ សារ៉េត និងប្រពន្ធរបស់គេ បានសែនដង្វាយត្រូវ បានជាឈ្មួញពីរនាក់នេះ អាចដឹកឈើកាត់មុខទីស្នាក់ការទាំងថ្ងៃទាំងយប់ បែរជាធ្វើមិនឃើញ ហើយឃើញតែ ប្រជាពលរដ្ឋ ដឹកឈើដូរបាយហូបតែម្យ៉ាង គត់។
ពាក់ព័ន្ធទៅនឹងបញ្ហានេះដែរ លោក អ៊ឹម សាវរិទ្ធ នាយខណ្ឌរដ្ឋបាលព្រៃឈើ មិនគួរមើលរំលោងមន្ត្រីរបស់ខ្លួន ដែលបណ្ដោយ និងបើកដៃឲ្យឈ្មួញ លោក«មហាទេពស្មើមេឃ» និងប្រពន្ធ បន្តដឹកឈើយ៉ាងរលូនយ៉ាងដូច្នេះ ។ សូមលោកនាយខណ្ឌមេតា្ត មើលកូនចៅក្រោមឱវាទនៅតាមបណ្តាលស្រុក ក្នុងខេត្តឧត្តរមានជ័យ ខ្លះផង បើមិនដូច្នេះព្រៃ នឹងរលាយអស់ហើយ ដោយសារមន្ដ្រីរបស់ខ្លួនត្រូវរ៉ូវគា្ន ជាមួយឈ្មួញរកស៊ីដឹកឈើនេះ ៕
ឈ្មួញឈើឈ្មោះ ម៉ៅ សារ៉េត រហស្សនាម«មហាទេពស្មើមេឃ» និងប្រពន្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
