ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យថា លោកសង្ឃឹមថា កិច្ចពិភាក្សាសម្រាប់បទឈប់បាញ់រវាងអ៊ីស្រាអែល និងក្រុមហាម៉ាស នឹងត្រូវឈានដល់កិច្ចព្រមព្រៀង នៅសប្តាហ៍នេះ។សហរដ្ឋអាមេរិកកំពុងគាំទ្របទឈប់បាញ់រយៈពេល ៦០ ថ្ងៃជាមួយនឹងការដោះលែងចំណាប់ខ្មាំងជាដំណាក់កាល ការដកទ័ពអ៊ីស្រាអែលចេញពីផ្នែកខ្លះនៃតំបន់ហ្កាហ្សា និងការពិភាក្សាដើម្បីបញ្ចប់ជម្លោះ។   

លោកTrump បានប្រាប់អ្នកយកព័ត៌មានថា "យើងកំពុងនិយាយ ហើយសង្ឃឹមថា យើងនឹងធ្វើឱ្យរឿងនោះមានភាពច្បាស់លាស់នៅសប្តាហ៍នេះ។ 

កាលពីយប់ថ្ងៃអង្គារ បន្ទាប់ពីទទួលទានអាហារពេលល្ងាចនៅសេតវិមានក្នុងក្រុងវ៉ាស៊ីនតោនសប្ដាហ៍មុន លោកTrumpនិងលោកនាយករដ្ឋមន្ត្រី Benjamin Netanyahu បានបើកកិច្ចប្រជុំជាលើកទីពីរ។

ក្រោយមក លោក Netanyahu បានបញ្ជាក់ថា ជំនួបជាមួយលោក Trump គឺផ្តោតលើកិច្ចខិតខំប្រឹងប្រែងដើម្បីធានាបាននូវការដោះលែងចំណាប់ខ្មាំងនៅសេសសល់ដែលត្រូវបានឃុំខ្លួននៅហ្កាហ្សា និងដើម្បីបំផ្លាញសមត្ថភាពយោធារបស់ក្រុមហាម៉ាស។      

ក្រុមហាម៉ាស បានឆ្លើយតបជាវិជ្ជមាននិងនិយាយថា ខ្លួនបានត្រៀមរួចជាស្រេចដើម្បីបន្តការចរចាឆ្ពោះទៅរកការអនុវត្តន៍កិច្ចព្រមព្រៀងបទឈប់បាញ់ និងដោះដូរអ្នកទោស។

អង្គការសហប្រជាជាតិបាននិយាយកាលពីថ្ងៃសុក្រ ទី១១ កក្កដាថា មនុស្សជិត៨០០នាក់បានស្លាប់ក្នុងពេលព្យាយាមទទួលបានជំនួយក្នុងតំបន់ហ្កាហ្សាចាប់តាំងពីចុងខែឧសភា ដោយភាគច្រើនត្រូវបានសម្លាប់នៅជិតទីតាំងរបស់មូលនិធិមនុស្សធម៌ហ្កាហ្សាគាំទ្រដោយសហរដ្ឋអាមេរិកនិងអ៊ីស្រាអែល។មូលនិធិមនុស្សធម៌ហ្កាហ្សា(GHF)បានចាប់ផ្តើមប្រតិបត្តិការកាលពីថ្ងៃទី២៦ ខែឧសភា បន្ទាប់ពីអ៊ីស្រាអែលបានផ្អាកការផ្គត់ផ្គង់ចូលទៅក្នុងតំបន់ហ្កាហ្សា រយៈពេលជាង២ខែ ដែលបង្កឱ្យមានការព្រមានអំពីគ្រោះទុរ្ភិក្សជិតមកដល់៕