ទីភ្នាក់ងារសារព័ត៌មានយ៉ុនហាប់ បានរាយការណ៍នៅថ្ងៃអាទិត្យ (១៣ កក្កដា) ថា ទីភ្នាក់ងារស៊ើបការណ៍សម្ងាត់ការពារជាតិរបស់កូរ៉េខាងត្បូង បានប្រកាសថា ទីក្រុងព្យុងយ៉ាងបានផ្គត់ផ្គង់កាំភ្លើងធំទំហំ ១៥២មីលីម៉ែត្រជាង ១២លានគ្រាប់ សរុបជិត ៣ម៉ឺនកុងតឺន័រ ឱ្យដល់ទីក្រុងមូស្គូ និងបានបញ្ជូនបុគ្គលិកយោធារាប់ពាន់នាក់ដើម្បីគាំទ្រដល់សង្គ្រាមរបស់រុស្ស៊ី ប្រឆាំងនឹងអ៊ុយក្រែន។

ទីភ្នាក់ងារចារកម្មកូរ៉េខាងត្បូង (DIA) រាយការណ៍ថា ចាប់តាំងពីខែតុលា ឆ្នាំ២០២៤មក កូរ៉េខាងជើងបានដឹកជញ្ជូនប្រហែល ២៨.០០០កុងតឺន័រ ដែលពោរពេញទៅដោយសព្វាវុធ និងគ្រាប់រំសេវធម្មតាទៅកាន់រុស្ស៊ី។ ដោយផ្អែកលើការគណនាស្ដង់ដារ ការដឹកជញ្ជូនទាំងនេះមានចំនួនជាង ១២លានគ្រាប់នៃកាំភ្លើងធំទំហំ ១៥២មីលីម៉ែត្រ ដែលជាកម្លាំងសំខាន់សម្រាប់ការវាយប្រហាររបស់រុស្ស៊ី។

ស្របគ្នានោះ ទីភ្នាក់ងារ DIA ប៉ាន់ប្រមាណថា ទីក្រុងព្យុងយ៉ាងបានបញ្ជូនបុគ្គលិកយោធាប្រមាណ ១៣.០០០នាក់ទៅកាន់ទឹកដីរុស្ស៊ី រួមទាំងកងទ័ពប្រយុទ្ធជួរមុខផងដែរ។ ក្នុងកំឡុងខែកក្កដា និងសីហា វិស្វករប្រយុទ្ធ និងទាហាន ៦.០០០នាក់ទៀត ត្រូវបានរំពឹងថានឹងទៅដល់តំបន់ Kursk ដើម្បីជួយក្នុងការបោសសម្អាតគ្រាប់មីន និងការងារពង្រឹងកម្លាំង នេះបើយោងតាមរបាយការណ៍របស់ DIA។

ការផ្តល់ទាំងសព្វាវុធនិងកងទ័ពនេះ កើតឡើងបន្ទាប់ពីមានសន្ធិសញ្ញាភាពជាដៃគូយុទ្ធសាស្ត្រ ដែលបានចុះហត្ថលេខាដោយមេដឹកនាំកូរ៉េខាងជើង លោក Kim Jong Un និងប្រធានាធិបតីរុស្ស៊ី លោក Vladimir Putin ក្នុងខែមិថុនា ឆ្នាំ២០២៤ ដែលបានបង្កើតកិច្ចព្រមព្រៀងការពារទៅវិញទៅមកជាផ្លូវការ និងពង្រីកកិច្ចសហប្រតិបត្តិការយោធាទ្វេភាគី៕