កូរ៉េខាងជើងបាននិយាយកាលពីថ្ងៃអាទិត្យថា ខ្លួនត្រៀមជាស្រេចក្នុងការចាត់វិធានការយោធា ដើម្បីទប់ទល់នឹងការគំរាមកំហែងផ្នែកសន្តិសុខណាមួយប្រឆាំងនឹងខ្លួន ក្នុងការព្រមានប្រឆាំងនឹងសហរដ្ឋអាមេរិក កូរ៉េខាងត្បូង និងជប៉ុន បន្ទាប់ពីការធ្វើសមយុទ្ធដែនអាកាសនាពេលថ្មីៗនេះដោយសម្ព័ន្ធមិត្តជាមួយនឹងយន្តហោះទម្លាក់គ្រាប់បែកយុទ្ធសាស្ត្ររបស់សហរដ្ឋអាមេរិក។    

សហរដ្ឋអាមេរិក កូរ៉េខាងត្បូង និងជប៉ុន បាននិងកំពុងពង្រីក ឬស្តារឡើងវិញនូវសមយុទ្ធយោធាត្រីភាគីរបស់ពួកគេ ដើម្បីឆ្លើយតបទៅនឹងកម្មវិធីនុយក្លេអ៊ែរដែលកំពុងរីកចម្រើនរបស់ប្រទេសកូរ៉េខាងជើង។

កាលពីថ្ងៃសុក្រសប្ដាហ៍មុន ប្រទេសទាំងបីបានធ្វើសមយុទ្ធដែនអាកាសរួមគ្នាដោយមានការចូលរួមពីយន្តហោះទម្លាក់គ្រាប់បែកមានសមត្ថភាពបំពាក់អាវុធនុយក្លេអ៊ែររបស់សហរដ្ឋអាមេរិកនៅជិតឧបទ្វីបកូរ៉េ ស្របពេលក្រុមមន្ត្រីយោធាជាន់ខ្ពស់របស់ប្រទេសទាំងបី បានជួបប្រជុំគ្នានៅទីក្រុងសេអ៊ូល។    

កូរ៉េខាងជើងចាត់ទុកសមយុទ្ធយោធាទ្រង់ទ្រាយធំៗ ដែលដឹកនាំដោយអាមេរិកថាជាការហាត់សមការឈ្លានពាន។ ដូច្នោះហើយ ខ្លួនបានលើកឡើងជាយូរមកហើយថា ខ្លួនត្រូវបានបង្ខំឱ្យផលិតអាវុធនុយក្លេអ៊ែរ ដើម្បីការពារខ្លួនពីការគំរាមកំហែងផ្នែកយោធារបស់សហរដ្ឋអាមេរិក។

យោងតាមសារព័ត៌មាន Saed News ក្នុងអំឡុងពេលដំណើរទស្សនកិច្ចទៅកាន់កូរ៉េខាងជើង រដ្ឋមន្ត្រីការបរទេសរុស្ស៊ីលោក Sergei Lavrov បានថ្កោលទោសការកើនឡើងនៃសមយុទ្ធយោធារួមគ្នាដោយសហរដ្ឋអាមេរិក កូរ៉េខាងត្បូង និងជប៉ុន ដោយអះអាងថា សមយុទ្ធទាំងនេះ រួមទាំងសមាសធាតុដែលមានសមត្ថភាពនុយក្លេអ៊ែរ បំផ្លាញសន្តិភាព និងសន្តិសុខក្នុងតំបន់អាស៊ី៕