អាជ្ញាធរបាននិយាយថា ខ្មាន់កាំភ្លើងម្នាក់បានសម្លាប់ស្ត្រីពីរនាក់នៅព្រះវិហារមួយកន្លែងក្នុងរដ្ឋ Kentucky សហរដ្ឋអាមេរិក ហើយបានបាញ់ទាហានរដ្ឋម្នាក់ឲ្យរងរបួសនៅខាងក្រៅអាកាសយានដ្ឋានមួយកាលពីថ្ងៃអាទិត្យ ទី១៣ កក្កដា មុនពេលនគរបាលអាចបាញ់សម្លាប់ខ្មាន់កាំភ្លើង។

ស្ត្រីទាំងពីរនាក់ត្រូវបានគេសម្លាប់នៅព្រះវិហារ Richmond Road Baptist ក្នុងទីក្រុង Lexington។ អធិការនគរបាលក្រុង Lexington លោក Lawrence Weathers បាននិយាយក្នុងសន្និសីទសារព័ត៌មានថា បុរសពីរនាក់បានរងរបួស រួមមានម្នាក់ស្ថិតក្នុងស្ថានភាពធ្ងន់ធ្ងរ។

លោក Weathers បាននិយាយថា នៅពេលដំបូងជនសង្ស័យបានបាញ់ទៅលើទាហានម្នាក់ បន្ទាប់ពីត្រូវបានបញ្ឈប់នៅជិតអាកាសយានដ្ឋាន Blue Grass។ ការបាញ់ប្រហារនេះបានកើតឡើងនៅលើផ្លូវនៅព័ទ្ធជុំវិញអាកាសយានដ្ឋាន ប៉ុន្តែពុំជាប់ពាក់ព័ន្ធជាមួយប្រតិបត្តិការរបស់អាកាសយានដ្ឋានទេ។

ក្រោយមកជនសង្ស័យបានប្លន់យករថយន្តមួយគ្រឿងនៅជិតអាកាសយានដ្ឋាន ហើយគេចខ្លួនទៅកាន់ព្រះវិហារ Richmond Road Baptist ជាកន្លែងដែលបុគ្គលរូបនេះ បានចាប់ផ្តើមបាញ់ប្រហារទៅលើមនុស្សនៅបរិវេណព្រះវិហារ។

នគរបាលបានតាមដានទីតាំងរថយន្តដែលត្រូវបានប្លន់យកទៅកាន់ព្រះវិហារ។ អធិការនគរបាលពុំបានបង្ហាញពីហេតុផលណាមួយសម្រាប់ការបាញ់ប្រហារនេះទេ ប៉ុន្តែបាននិយាយថា មានការបង្ហាញខ្លះៗថា ជនសង្ស័យប្រហែលជាស្គាល់មនុស្សមួយចំនួននៅក្នុងព្រះវិហារ។