ទារករកើតមិនគ្រប់ខែរាប់សិបនាក់ នៅមន្ទីរពេទ្យ Al-Shifa ក្នុងដែនដីហ្កាហ្សាភាគខាងជើង កំពុងប្រឈមការស្លាប់ ខណៈប្រេងឥន្ធនៈ និងអគ្គិសនី សម្រាប់ទ្រទ្រង់ឧបករណ៍សង្គ្រោះអាយុជីវិតមនុស្សខ្វះខាតកាន់តែខ្លាំង។    

ស្របពេលប្រេងឥន្ធនៈកំពុងដំណើរការនៅមានកម្រិតទាប ការដាច់ចរន្តអគ្គិសនី និងអុកស៊ីហ្សែននៅសល់កាន់តែតិច ឧបករណ៍សំខាន់ៗរបស់មន្ទីរពេទ្យបានបិទម្តងមួយៗ ដោយធ្វើឱ្យជីវិតទារកកើតមិនគ្រប់ខែរាប់សិបនាក់ ដែលពឹងផ្អែកទាំងស្រុងលើបំពង់ខ្យល់ និងឧបករណ៍ចិញ្ញឹមទារក ប្រឈមនឹងការស្លាប់គ្រប់ពេលវេលា។ 

អ្នកស្រុកម្នាក់ឈ្មោះ Mohammed Natiez បានចាកចេញពីបន្ទប់សម្រាលដោយបីកូនស្រីរបស់លោកដែលទើបតែស្លាប់ ទាំងទឹកភ្នែក។ 

ប៉ុន្មានថ្ងៃមុននេះ ភរិយារបស់លោកក្នុងខែទីប្រាំពីរនៃការមានផ្ទៃពោះបានរងរបួសយ៉ាងធ្ងន់ធ្ងរពីការវាយប្រហារតាមអាកាសរបស់អ៊ីស្រាអែល។ រូបនាងត្រូវបានគេជួយសង្គ្រោះពីក្រោមគំនរបាក់បែក ហើយបានបញ្ជូនទៅមន្ទីរពេទ្យ Al-Shifaភ្លាមៗ ហើយគ្រូពេទ្យបានធ្វើការវះកាត់ជាបន្ទាន់។

ទោះជាយ៉ាងណាក៏ដោយ នៅពេលទារិកាត្រូវបានផ្ទេរទៅមណ្ឌលថែទាំ ពួកគេបានប្រឈមនឹងវិបត្តិថ្មីមួយ ពោលគឺមិនមានប្រេងឥន្ធនៈនៅសល់ក្នុងមន្ទីរពេទ្យ ដើម្បីផ្តល់ថាមពលដល់ឧបករណ៍វេជ្ជសាស្ត្រនោះទេ។ បុគ្គលិកពេទ្យគ្មានជម្រើសអ្វីក្រៅពីដាក់ទារកមិនគ្រប់ខែចំនួនប្រាំ ឬប្រាំមួយនាក់ ឱ្យនៅជាមួយគ្នា ក្នុងកែវចិញ្ចឹម តែមួយ ឬប្រើភួយដើម្បីផ្ដល់កម្ដៅដល់ទារកទាំងនោះ៕