ភាគីជម្លោះរុស្ស៊ី និងអ៊ុយក្រែន បានរាយការណ៍បច្ចុប្បន្នភាពសមរភូមិជួរមុខកាលពីថ្ងៃអាទិត្យ (១៣ កក្កដា) ថា កងកម្លាំងរុស្ស៊ី បានបន្តបើកការវាយប្រហារតាមផ្លូវអាកាសទៅលើទីតាំងឧស្សាហកម្ម-យោធាអ៊ុយក្រែន ដោយបានកម្ទេចប្រព័ន្ធការពារដែនអាកាសរបស់អាមេរិកនៅទីនោះ ខណៈទីក្រុងគីវ បានបន្តវាយប្រហារតបតទៅវិញ និងរាយការណ៍ថាវាយប្រហារដ៏ខ្លាំងក្លាកំពុងប្រមូលផ្ដុំក្នុងក្រុង Pokrovsk។

យោងតាមការសង្ខេបប្រចាំថ្ងៃរបស់ក្រសួងការពារជាតិរុស្ស៊ីបានឱ្យដឹងថា កងទ័ពរបស់ខ្លួនបានគ្រប់គ្រងទីតាំងទីលំនៅចំនួនពីរបន្ថែមទៀតនៅក្នុងតំបន់ Donetsk ខណៈកំណត់គោលដៅលើឧស្សាហកម្មការពារជាតិអ៊ុយក្រែន មជ្ឈមណ្ឌលបណ្តុះបណ្តាលប្រតិបត្តិករយានដ្រូន និងចំណុចដាក់ពង្រាយបណ្តោះអាសន្ន។

ក្រសួងរុស្ស៊ីបានរាយការណ៍ជាពិសេសថាបានបំផ្លាញប្រព័ន្ធមីស៊ីល Patriot ចំនួនពីរ ផលិតដោយអាមេរិក និងស្ថានីយរ៉ាដាមួយ ក្នុងការវាយប្រហារលើអ៊ុយក្រែន។ ទីក្រុងមូស្គុក៏បាននិយាយថា កងកម្លាំងខ្លួនបានស្ទាក់ចាប់យានទម្លាក់គ្រាប់បែកពីលើអាកាសចំនួន ៩គ្រឿង និងយានដ្រូន ២១៥ គ្រឿង។

ជាមួយគ្នានេះ អគ្គសេនាធិការរបស់អ៊ុយក្រែន បានទទួលស្គាល់ការប្រយុទ្ធគ្នាដ៏ខ្លាំងក្លានៅទូទាំងជួរមុខ ដោយមានការចូលរួមប្រយុទ្ធចំនួន ៩៧ទីតាំងត្រូវបានកត់ត្រានៅរសៀលថ្ងៃអាទិត្យ។ ទិសដៅក្រុង Pokrovsk នៅតែជាតំបន់ជម្លោះសកម្មបំផុត ដែលកងកម្លាំងអ៊ុយក្រែនអះអាងថា បានវាយបកលើការវាយប្រហាររបស់រុស្ស៊ី ជាច្រើនលើក៕