មជ្ឈមណ្ឌលឧតុនិយមជាតិចិន (NMC) បានព្រមានកាលពីថ្ងៃអាទិត្យ (១៣ កក្កដា) ថា កម្ដៅដ៏គ្រោះថ្នាក់នៅប្រទេសចិន នឹងបន្តអូសបន្លាយនៅសប្តាហ៍ថ្មីនេះ ជាមួយនឹងតំបន់ថ្នាក់ខេត្តប្រហែល ១០កន្លែង កំពុងទប់ទល់នឹងសីតុណ្ហភាពកើនឡើងលើសពី ៤០អង្សាសេ។

ខេត្តជាច្រើនដូចជា ហឺណាន ភាគកណ្តាលនៃប្រទេសចិន និងខេត្ត សានតុង ភាគខាងកើត ត្រូវបានព្យាករថានឹងជួបប្រទះនឹងរលកកម្ដៅដែលខ្លាំងខុសពីធម្មតាសម្រាប់ឆ្នាំនេះ។ តំបន់ថ្នាក់ខេត្តជាង១៥ផ្សេងទៀតក៏នឹងរងផលប៉ះពាល់ផងដែរ។

ចាប់តាំងពីថ្ងៃសៅរ៍ចុងសប្ដាហ៍មក សីតុណ្ហភាពក្ដៅខ្លាំងត្រូវបានកត់ត្រានៅទូទាំងប៉ែកខាងលិចនៃភាគខាងជើងប្រទេសចិន ដូចជាតំបន់ស្វយ័តម៉ុងហ្គោលីខាងក្នុង តំបន់ប៉េកាំង-ធានជីន-ហឺប៉ី ជាដើម ដោយនៅតំបន់ខ្លះ សីតុណ្ហភាពឡើងលើសពី ៣៧អង្សាសេ នេះបើតាមការត្រួតពិនិត្យឧតុនិយម។

នៅថ្ងៃអាទិត្យ កម្ដៅបានកាន់តែខ្លាំងឡើង ហើយរាលដាលទៅភាគខាងត្បូង ជាពិសេសផ្នែកខ្លះនៃខេត្តហឺប៉ី ភាគកណ្តាល និងភាគខាងត្បូង រួមទាំងផ្នែកភាគច្រើននៃក្រុង ធានជីន ។ សីតុណ្ហភាពនៅតំបន់ខ្លះនៅភាគខាងលិចខេត្តសានតុង និងភាគឦសាននៃខេត្ត ហឺណាន អាចលើសពី ៤០អង្សាសេ។ អាជ្ញាធរព្រមានថា កម្ដៅខ្លាំងបែបនេះរំពឹងថានឹងកើនឡើងបន្ថែមទៀតនៅក្នុងសប្តាហ៍ខាងមុខនេះ៕