ប្រព័ន្ធផ្សព្វផ្សាយក្នុងស្រុករាយការណ៍ថា ប្រេសិតពាណិជ្ជកម្មជាន់ខ្ពស់របស់កូរ៉េខាងត្បូង បាននិយាយនៅថ្ងៃចន្ទ (១៤ កក្កដា) នេះថា ទីក្រុងសេអ៊ូលអាចធ្វើកិច្ចព្រមព្រៀងពាណិជ្ជកម្ម "ជាគោលការណ៍" ជាមួយសហរដ្ឋអាមេរិក ត្រឹមថ្ងៃផុតកំណត់ទី០១ ខែសីហា ហើយបានឱ្យសញ្ញាថា កូរ៉េខាងត្បូងអាចនឹងបើកចំហក្នុងការអនុញ្ញាតចូលទៅកាន់ទីផ្សារកសិកម្មរបស់ខ្លួនកាន់តែច្រើន។

រដ្ឋមន្ត្រីក្រសួងពាណិជ្ជកម្ម លោក Yeo Han-koo ដែលជួបពិភាក្សាកម្រិតខ្ពស់ជាមួយមន្ត្រីអាមេរិកកាលពីសប្តាហ៍មុន បាននិយាយថា កូរ៉េខាងត្បូងកំពុងព្យាយាមបញ្ចៀសពន្ធគយ "អយុត្តិធម៌" របស់អាមេរិក លើវិស័យសំខាន់ៗនៃឧស្សាហកម្មសក្តានុពលរបស់ខ្លួន ដែលនឹងធ្វើឱ្យខូចកិច្ចសហប្រតិបត្តិការឧស្សាហកម្មជាមួយសម្ព័ន្ធមិត្តសន្តិសុខ និងដៃគូពាណិជ្ជកម្មដ៏សំខាន់។

កាលពីថ្ងៃអាទិត្យក្នុងរដ្ឋ Maryland ប្រធានាធិបតីអាមេរិក លោក Donald Trump បានប្រាប់អ្នកសារព័ត៌មានថា "កូរ៉េខាងត្បូងចង់ធ្វើកិច្ចព្រមព្រៀងមួយនៅពេលនេះ"។ លោកមិនបានបញ្ជាក់លម្អិតឡើយអំពីចំណុចសំខាន់ដែលអាចសម្រេចកិច្ចព្រមព្រៀងដ៏លំបាកនេះបាន ឬក៏ពេលវេលាប៉ាន់ស្មានសម្រាប់ការបន្តកិច្ចចរចានោះទេ។



គួរឱ្យដឹងថា កូរ៉េខាងត្បូងកំពុងប្រឹងប្រែងឈានដល់កិច្ចព្រមព្រៀងពាណិជ្ជកម្មក្របខណ្ឌមួយ ក្នុងក្តីសង្ឃឹមថាអាចជៀសវាងពន្ធ ២៥% លើការនាំចេញរបស់ខ្លួនទៅអាមេរិក ដែលគ្រោងនឹងចាប់ផ្តើមនៅថ្ងៃទី០១ ខែសីហា បន្ទាប់ពីការចាប់ផ្តើមដ៏យឺតយ៉ាវក្នុងការចរចាពន្ធ ព្រោះតែប្រធានាធិបតីថ្មី លោក Lee Jae-myung ទើបជាប់ឆ្នោតចូលកាន់តំណែងកាលពីខែមុន៕