អាជ្ញាធរឃើដរបស់ប្រទេសស៊ីរីកាលពីថ្ងៃអាទិត្យ បានអំពាវនាវម្តងទៀតដល់ប្រព័ន្ធរដ្ឋាភិបាល ដែលរក្សាវិសាលភាពនៃស្វ័យភាពជាក់ស្តែងរបស់ពួកគេ រយៈពេលប៉ុន្មានថ្ងៃបន្ទាប់ពីក្រុងដាម៉ាស បានបដិសេធ «ទម្រង់ណាមួយ» នៃវិមជ្ឈការ។

លោក Mazloum Abdi នៃកងកម្លាំងប្រជាធិបតេយ្យស៊ីរី (SDF) ដែលជាកងទ័ពពិតប្រាកដរបស់រដ្ឋបាលឃើដ និងប្រធានាធិបតីបណ្តោះអាសន្នលោក Ahmed Al-Sharaa បានចាប់ផ្តើមកិច្ចព្រមព្រៀងមួយកាលពីខែមីនា ដើម្បីធ្វើសមាហរណកម្មស្ថាប័នឃើដ ទៅក្នុងរដ្ឋ ប៉ុន្តែការអនុវត្តនៃការធ្វើសមាហរណកម្មនេះ ត្រូវបានរារាំងដោយភាពខុសគ្នារវាងភាគីទាំងពីរ។

អ្នកទាំងពីរ បានជួបគ្នាម្តងទៀតកាលពីថ្ងៃពុធ ដោយមានវត្តមានរបស់បេសកជនអាមេរិក ដើម្បីពិភាក្សាអំពីកិច្ចខិតខំប្រឹងប្រែង ដែលជាប់គាំង ប៉ុន្តែបន្ទាប់ពីនោះ ទីក្រុងដាម៉ាស បានអះអាងឡើងវិញនូវការប្រឆាំងរបស់ខ្លួនចំពោះ«ទម្រង់នៃការបែងចែក ឬសហព័ន្ធណាមួយ» ហើយបានអំពាវនាវឲ្យយុទ្ធជននៃកងកម្លាំងប្រជាធិបតេយ្យស៊ីរី( SDF) ត្រូវបានដាក់បញ្ចូលទៅក្នុងជួរកងទ័ព។

នៅក្នុងសេចក្តីថ្លែងការណ៍មួយកាលពីថ្ងៃអាទិត្យ រដ្ឋបាលឃើដបានអំពាវនាវឲ្យមាន «ប្រព័ន្ធប្រជាធិបតេយ្យពហុនិយម យុត្តិធម៌សង្គម សមភាពយេនឌ័រ និងរដ្ឋធម្មនុញ្ញដែលធានាសិទ្ធិនៃសមាសធាតុទាំងអស់»នៃសង្គម។

សេចក្តីថ្លែងការណ៍បានបញ្ជាក់ថា៖«ស៊ីរីបានរងទុក្ខអស់ជាច្រើនទសវត្សរ៍ពីប្រព័ន្ធកណ្តាលដែលផ្តាច់មុខអំណាច និងទ្រព្យសម្បត្តិ គាបសង្កត់ឆន្ទៈក្នុងស្រុក និងអូសទាញប្រទេសនេះ ឲ្យធ្លាក់ក្នុងវិបត្តិជាបន្តបន្ទាប់»។