ចក្រភពអង់គ្លេសកាលពីថ្ងៃអាទិត្យ បានប្រកាសមូលនិធិចំនួន ៥០០ លានផោន (៦៧៥ លានដុល្លារ) ដែលមានបំណងជួយដល់កុមារដែលងាយរងគ្រោះ រហូតដល់ ២០០.000នាក់។

រដ្ឋាភិបាលបាននិយាយថា មូលនិធិអនាគតល្អប្រសើរ (Better Futures Fund) មានគោលបំណងផ្តល់ការគាំទ្រដល់គ្រួសារដែលជួបការលំបាក និងផ្តល់ឲ្យកុមារទទួលបានការអប់រំកាន់តែប្រសើរ និងផ្ទះដែលមានសុវត្ថិភាព ក្នុងរយៈពេល ១០ឆ្នាំ ខាងមុខ។

លោកនាយករដ្ឋមន្ត្រី Keir Starmer និងរដ្ឋមន្ត្រីហិរញ្ញវត្ថុរបស់ខ្លួនលោកស្រី Rachel Reeves គឺស្ថិតនៅក្រោមសម្ពាធពីសមាជិកសភាគណបក្សការងារផ្ទាល់របស់ពួកគេ ក្នុងការផ្តល់ការគាំទ្របន្ថែមទៀតសម្រាប់គ្រួសារដែលមានប្រាក់ចំណូលទាប។

កាលពីដើមខែនេះ លោក Starmer ត្រូវបានបង្ខំឲ្យកាត់ផ្នែកសំខាន់ៗនៃផែនការកំណែទម្រង់សុខុមាលភាពរបស់លោក ដើម្បីអនុម័តច្បាប់ តាមរយៈសភា។

លោកស្រី Reeves បាននិយាយនៅក្នុងសេចក្តីថ្លែងការណ៍មួយថា៖«មូលនិធិនេះ នឹងផ្តល់ឲ្យកុមាររាប់រយពាន់នាក់ យុវជន និងក្រុមគ្រួសាររបស់ពួកគេ នូវឱកាសកាន់តែប្រសើរឡើង»។

«[ផែនការសម្រាប់ការផ្លាស់ប្តូររបស់យើង] នឹងបំបែកឧបសគ្គចំពោះឱកាស និងផ្តល់ឲ្យពួកគេនូវការចាប់ផ្តើមដ៏ល្អបំផុត នៅក្នុងជីវិត។

ក្រសួងហិរញ្ញវត្ថុ បានបញ្ជាក់ថា ខ្លួនគ្រោងនឹងរៃអង្គាសប្រាក់ចំនួន ៥០០លានផោនទៀត ពីរដ្ឋាភិបាលក្នុងតំបន់ អ្នកវិនិយោគសង្គម និងសប្បុរសជន។