អង្គភាពសេវាសន្តិសុខប្រទេសអ៊ុយក្រែនបាននិយាយថា ខ្លួនបានសម្លាប់ភ្នាក់ងារដែលធ្វើការឱ្យរុស្ស៊ី ជាអ្នកដែលបានសម្លាប់មន្ត្រីជាន់ខ្ពស់ម្នាក់របស់អង្គភាពខ្លួនកាលពីសប្តាហ៍មុន។ អាជ្ញាធរអ៊ុយក្រែន បាននិងកំពុងស៊ើបអង្កេតករណីឃាតកម្មដែលបានកើតឡើងកាលពីថ្ងៃព្រហស្បតិ៍នៅក្នុងរដ្ឋធានីគីវ។ មន្ត្រីជាន់ខ្ពស់រូបនោះបម្រើការក្នុងផ្នែករបស់អង្គភាពសេវាសន្តិសុខដែលជាប់ពាក់ព័ន្ធនឹងការវាយប្រហារដោយយានដ្រូន និងប្រតិបត្តិការដ៏បំផ្លាញប្រឆាំងរុស្ស៊ី។

ប្រធានអង្គភាពសេវាសន្តិសុខ លោក Vasyl Maliuk បានចេញសេចក្តីថ្លែងការណ៍មួយកាលពីថ្ងៃអាទិត្យដែលបង្ហាញថាអង្គការរបស់លោកបានកម្ចាត់ភ្នាក់ងាររបស់អង្គភាពសេវាសន្តិសុខសហព័ន្ធរបស់រុស្ស៊ី ដែលខ្លួនជឿថាជាអ្នកនៅពីក្រោយឃាតកម្ម។ សេចក្តីថ្លែងការណ៍បាននិយាយថា ក្រុមអ្នកស៊ើបអង្កេត បានព្យាយាមឃាត់ខ្លួនភ្នាក់ងារនៅកន្លែងលាក់ខ្លួនរបស់ពួកគេ ប៉ុន្តែបានសម្លាប់ពួកគេនៅក្នុងការបាញ់ប្រហារពេលរឹងទទឹងមិនឲ្យចាប់ខ្លួន។ អង្គភាពសេវាសន្តិសុខបាននិយាយថា ភ្នាក់ងារពីរនាក់ បុរសម្នាក់និងស្ត្រីម្នាក់ ត្រូវបានគេគិតថា ជាប់ពាក់ព័ន្ធក្នុងការសម្លាប់មន្ត្រីអ៊ុយក្រែន។ ប៉ុន្តែគេមិនបាននិយាយថាតើភ្នាក់ងារប៉ុន្មាននាក់ត្រូវបានសម្លាប់ក្នុងអំឡុងពេលប្រតិបត្តិការនោះទេ។ របាយការណ៍ប្រព័ន្ធផ្សព្វផ្សាយជាច្រើនបាននិយាយថា ក្រសួងសេវាសន្តិសុខអ៊ុយក្រែនដែលមន្ត្រីត្រូវបានសម្លាប់ លោកមានតួនាទីសំខាន់ក្នុងការវាយប្រហារឆ្លងព្រំដែនធ្វើឡើងជាមួយកងកម្លាំងអ៊ុយក្រែន ចូលទៅក្នុងតំបន់ Kursk ភាគខាងលិចប្រទេសរុស្ស៊ី កាលពីរដូវក្តៅមុន។