បើយោងតាមការស្ទង់មតិមួយ បានឲ្យដឹងថា ប្រជាជនថៃភាគច្រើន ចង់ឲ្យនាយករដ្ឋមន្ត្រី លោកស្រី Paetongtarn Shinawatra (ផែថងថាន ស៊ីណាវ៉ាត់) លាលែងពីតំណែង ឬរំលាយសភា ដើម្បីបន្ធូរបន្ថយភាពចលាចលផ្នែកនយោបាយ បន្ទាប់ពីលោកស្រីត្រូវបានព្យួរតំណែងដោយតុលាការធម្មនុញ្ញរបស់ប្រទេស។

ការស្ទង់មតិ ដែលត្រូវបានធ្វើឡើងនៅថ្ងៃទី ៤-៧ ខែកក្កដា ដោយវិទ្យាស្ថានជាតិគ្រប់គ្រងកាអភិវឌ្ឍ ឬ Nida បានឲ្យដឹងថា អ្នកឆ្លើយតប ៤២,៤ភាគរយ បានប្រាប់ថា លោកស្រី Paetongtarn គួរតែលាលែងពីតំណែង ដើម្បីបើកផ្លូវឲ្យមាននាយករដ្ឋមន្ត្រីថ្មី ខណៈដែល ៣៩,៩ភាគរយ គាំទ្រការរំលាយសភា ដើម្បីរៀបចំការបោះឆ្នោតថ្មី។

ទន្ទឹមនឹងនេះដែរ ការស្ទង់មតិបានបង្ហាញបន្ថែមទៀតថា ប្រហែល ១៥ភាគរយនៃអ្នកចូលរួមឆ្លើយតប រំពឹងថា នាយករដ្ឋមន្ត្រីនឹងបន្តកាន់តំណែង ហើយ ១,៤ភាគរយគាំទ្រឲ្យធ្វើរដ្ឋប្រហារ ដើម្បីផ្លាស់ប្តូររដ្ឋាភិបាល។ កាលពីថ្ងៃអាទិត្យ (ទី១៣ ខែកក្កដា) Nida បានបញ្ជាក់ថា ជនជាតិថៃប្រហែល ១.៣១០នាក់ ដែលមានអាយុចាប់ពី ១៨ឆ្នាំឡើងទៅ ត្រូវបានសម្ភាសនៅក្នុងការស្ទង់មតិ ដែលកម្រិតល្អៀង គឺ ៣ភាគរយ។

គូរបញ្ជាក់ថា ការស្ទង់មតិបានបង្ហាញថា ៣២,៨ភាគរយនៃអ្នកឆ្លើយតប គាំទ្រអតីតនាយករដ្ឋមន្ត្រី លោក Prayut Chan-o-cha (ប្រាយុធ ចាន់ អូចា) ដែលបានដឹកនាំរដ្ឋប្រហារចុងក្រោយ ជាជម្រើសដ៏ល្អបំផុត សម្រាប់តំណែងនាយករដ្ឋមន្ត្រី ខណៈដែល ១១,៥ភាគរយ គាំទ្រមេដឹកនាំគណបក្ស Bhumjaithai (ភូមិចៃថៃ) លោក Anutin Charnvirakul (អនុធីន ឆានវីរ៉ាក់គុណ) និង ១០,៩ភាគរយគាំទ្រ លោក Chaikasem Nitisiri (ឆៃកាសេម និធិសិរិ) របស់គណបក្ស Pheu Thai (ភឿថៃ)។ ការស្ទង់មតិនេះ ក៏បានបង្ហាញដែរថា ប្រមាណជា ២៧,៩ភាគរយ មិនមានជម្រើសបុគ្គលពិសេសណាម្នាក់ សម្រាប់ស្នងតំណែងរបស់លោកស្រី Paetongtarn ឡើយ៕