សមយុទ្ធយោធាដ៏ធំបំផុតមិនធ្លាប់មាន នៅក្នុងប្រទេសអូស្ត្រាលី គឺសមយុទ្ធ Talisman Sabre កំពុងប្រព្រឹត្តទៅ ហើយរំពឹងថា នឹងទាក់ទាញការចាប់អារម្មណ៍ពីនាវាចារកម្មរបស់ចិន។ សមយុទ្ធ Talisman Saber នេះ បានចាប់ផ្តើមនៅក្នុងឆ្នាំ២០០៥ ដែលជាការហ្វឹកសមរួមគ្នារៀងរាល់ ២ឆ្នាំម្ដង រវាងសហរដ្ឋអាមេរិក និងអូស្ត្រាលី។

តែក្រសួងការពារជាតិអូស្ត្រាលី កាលពីថ្ងៃអាទិត្យ (ទី១៣ ខែកក្កដា) បានឲ្យដឹងថា នៅឆ្នាំនេះ បុគ្គលិកយោធាជាង ៣៥.០០០នាក់មកពីប្រទេសចំនួន ១៩ (កាណាដា ហ្វីជី បារាំង អាល្លឺម៉ង់ ឥណ្ឌា ឥណ្ឌូនេស៊ី ជប៉ុន ហូឡង់ នូវែលហ្សេឡង់ ន័រវេស ប៉ាពួញូហ្គីណេ ហ្វីលីពីន កូរ៉េខាងត្បូង សិង្ហបុរី ថៃ តុងហ្គា និងចក្រភពអង់គ្លេស) នឹងចូលរួមការហាត់សមជាមួយគ្នា ក្នុងរយៈពេល ៣សប្តាហ៍។

ចំណែកប្រទេសម៉ាឡេស៊ី និងវៀតណាម ក៏កំពុងចូលរួមផងដែរ ក្នុងនាមជាអ្នកសង្កេតការណ៍។ សកម្មភាពខ្លះៗនៃសមយុទ្ធនេះក៏នឹងធ្វើឡើងផងដែរនៅប៉ាពួញូហ្គីណេ ដែលជាប្រទេសជិតខាងកៀកបំផុតនឹងអូស្ត្រាលី ដោយនេះវាជាលើកទី១ ហើយ ដែលសមយុទ្ធ Talisman Saber ត្រូវបានប្រារព្ធឡើងនៅខាងក្រៅប្រទេសអូស្ត្រាលី។

រដ្ឋមន្ត្រីក្រសួងឧស្សាហកម្មការពារជាតិ លោក Pat Conroy បាននិយាយថា នាវាឈ្លបយកការណ៍របស់ចិន បានតាមមើលសមយុទ្ធកងទ័ពជើងទឹក នៅឆ្នេរសមុទ្រអូស្ត្រាលី ក្នុងអំឡុងពេលមានសមយុទ្ធ Talisman Saber ចំនួន ៤លើកចុងក្រោយ ហើយត្រូវបានគេរំពឹងថា នឹងតាមឃ្លាំមើលសមយុទ្ធបច្ចុប្បន្ននេះទៀត។

ហើយអ្វីដែលសំខាន់នោះ គឺថា សមយុទ្ធដែលបង្ហាញពីសម្ព័ន្ធភាពការពារជាតិរបស់អូស្ត្រាលីជាមួយសហរដ្ឋអាមេរិក បានចាប់ផ្តើមឡើងមួយថ្ងៃបន្ទាប់ពីនាយករដ្ឋមន្ត្រីអូស្ត្រាលី លោក Anthony Albanese បានចាប់ផ្តើមដំណើរទស្សនកិច្ចរយៈពេល ៦ថ្ងៃទៅកាន់ប្រទេសចិន ជាកន្លែងដែលលោកត្រូវបានគេរំពឹងថា នឹងមានកិច្ចប្រជុំទល់មុខគ្នាលើកទី៤ ជាមួយប្រធានាធិបតីចិន លោក Xi Jinping នៅទីក្រុងប៉េកាំង នាថ្ងៃអង្គារ៕