រដ្ឋមន្ត្រីការពារជាតិអាល្លឺម៉ង់ លោក Boris Pistorius ធ្វើដំណើរទៅកាន់ទីក្រុងវ៉ាស៊ីនតោន នៅថ្ងៃចន្ទ (ទី១៤ ខែកក្កដា) នេះ ដោយលោកនឹងជួបជាមួយរដ្ឋមន្ត្រីការពារជាតិអាមេរិក លោក Pete Hegseth ដើម្បីស្វែងរកភាពច្បាស់លាស់ អំពីការផ្គត់ផ្គង់អាវុធអាមេរិកដល់អ៊ុយក្រែន ផែនការដាក់ពង្រាយមីស៊ីល និងកម្រិតនៃវត្តមានកងទ័ពអាមេរិក នាពេលអនាគត នៅអឺរ៉ុប។

លោក Pistorius ទំនងជាទទួលបានការទទួលស្វាគមន៍យ៉ាងកក់ក្តៅ ខណៈដែលប្រទេសមានសេដ្ឋកិច្ចដ៏ធំបំផុតរបស់អឺរ៉ុប ថ្មីៗនេះ បានលេចមុខឡើងក្នុងនាមជាតួអង្គដ៏សំខាន់ ក្នុងការពង្រីកបន្ថែមយោធាដ៏ធំបំផុតរបស់អង្គការណាតូ (NATO) គិតចាប់តាំងពីសម័យសង្គ្រាមត្រជាក់ បន្ទាប់ពីបានចំណាយក្នុងកម្រិតទាបលើវិស័យការពារជាតិអស់ជាច្រើនទសវត្សរ៍។

អំឡុងកិច្ចប្រជុំជាមួយលោក Hegseth នៅឯមន្ទីរបញ្ចកោណ លោក Pistorius នឹងពិភាក្សាអំពីការផ្តល់ជូនរបស់ទីក្រុងប៊ែរឡាំង ក្នុងការបង់ប្រាក់ទិញប្រព័ន្ធការពារដែនអាកាសអាមេរិក Patriot សម្រាប់អ៊ុយក្រែន ជាសំណើមួយដែលត្រូវបានផ្សព្វផ្សាយជាសាធារណៈដោយអធិការបតី លោក Friedrich Merz កាលពីសប្តាហ៍មុន បន្ទាប់ពីការពិភាក្សាឯកជន មិនជោគជ័យ ក្នុងការទទួលបានការឆ្លើយតបពីទីក្រុងវ៉ាស៊ីនតោន។

កាលពីថ្ងៃអាទិត្យចុងសប្ដាហ៍កន្លងមក ប្រធានាធិបតីអាមេរិក លោក Donald Trump បាននិយាយថា លោកនឹងបញ្ជូនមីស៊ីល Patriot ទៅអ៊ុយក្រែន។ លោក Trump មិនបានផ្តល់ចំនួនឲ្យដឹងឡើយ ប៉ុន្តែលោកបាននិយាយថា សហរដ្ឋអាមេរិកនឹងត្រូវទទួលបានការសងត្រលប់វិញដោយសហភាពអឺរ៉ុប សម្រាប់ការចំណាយលើប្រព័ន្ធការពារនេះ។

ប្រទេសអាឡឺម៉ង់បានផ្ដល់ប្រព័ន្ធការពារ Patriot ចំនួន ៣គ្រឿងរួចហើយឲ្យទីក្រុងគីវ ខណៈដែលអ៊ុយក្រែនប្រឈមនឹងការវាយប្រហារយ៉ាងធ្ងន់ធ្ងរបំផុតមួយចំនួនរបស់រុស្ស៊ី ក្នុងប៉ុន្មានសប្តាហ៍ថ្មីៗនេះ៕