ទីភ្នាក់ងារសារព័ត៌មាន Fars ពាក់កណ្តាលផ្លូវការរបស់ប្រទេសអ៊ីរ៉ង់ បានរាយការណ៍ថា ការផ្ទុះមួយនៅអគារលំនៅឋានមួយ បានបណ្តាលឲ្យមនុស្ស ៧ នាក់រងរបួស នៅក្នុងសង្កាត់ Pardisan នៃទីក្រុង Qom ដោយបន្តដកស្រង់ប្រភពមិនបញ្ចេញឈ្មោះដែលនិយាយថា នេះគឺមិនមែនជាលទ្ធផលនៃការវាយប្រហារណាមួយរបស់អ៊ីស្រាអែលនោះទេ។

ប្រធាននាយកដ្ឋានពន្លត់អគ្គិភ័យ Qom បានប្រាប់សារព័ត៌មាន Fars ថា៖«បន្ទប់ចំនួន៤របស់អគារនោះ ត្រូវបានខូចខាត នៅក្នុងការផ្ទុះនេះ។ ការវាយតម្លៃដំបូងបង្ហាញថា មូលហេតុនៃឧប្បត្តិហេតុនេះ គឺមានការលេចធ្លាយឧស្ម័ន ហើយការតាមដាន កំពុងបន្តលើករណីនេះ»។

ទីភ្នាក់ងារនេះ បាននិយាយថា អ្នករស់នៅក្នុងអគារនោះ គឺជាពលរដ្ឋសាមញ្ញ។

អ៊ីស្រាអែល ដែលជាគូប្រជែងក្នុងតំបន់របស់អ៊ីរ៉ង់ មានកំណត់ត្រានៃការធ្វើឃាតអ្នកវិទ្យាសាស្ត្រនុយក្លេអ៊ែរអ៊ីរ៉ង់ ដែលខ្លួនចាត់ទុកថា ជាផ្នែកមួយនៃកម្មវិធីដែលគំរាមកំហែងអ៊ីស្រាអែលដោយផ្ទាល់។ ទីក្រុងតេអេរ៉ង់ រក្សាកម្មវិធីនុយក្លេអ៊ែររបស់ខ្លួន គឺសម្រាប់តែគោលបំណងសន្តិភាពប៉ុណ្ណោះ។

ចាប់តាំងពីការបញ្ចប់សង្រ្គាមផ្លូវអាកាសរយៈពេល ១២ថ្ងៃ កាលពីខែមុន រវាងអ៊ីរ៉ង់ និងអ៊ីស្រាអែល ដែលនៅក្នុងនោះ អ៊ីស្រាអែល និងសហរដ្ឋអាមេរិក បានវាយប្រហារទីតាំងនុយក្លេអ៊ែររបស់អ៊ីរ៉ង់ ការផ្ទុះជាច្រើនបានកើតឡើង នៅក្នុងប្រទេសអ៊ីរ៉ង់ ប៉ុន្តែអាជ្ញាធរ មិនបានបន្ទោសអ៊ីស្រាអែលទេ។