ការសិក្សាមួយបានរកឃើញថា ធុរកិច្ចនៅក្នុងប្រទេសអង់គ្លេស កំពុងធ្លាក់ចុះនូវការជួលបុគ្គលិកធ្វើការ ដែលទំនងជាប៉ះពាល់ដោយសារវត្តមានរបស់បញ្ញាសិប្បនិម្មិត (AI) ដោយបានលើកឡើងពីបច្ចេកវិទ្យាថ្មី ដែលកំពុងធ្វើឲ្យធ្លាក់ចុះខ្លាំងទៅៗ នៅក្នុងទីផ្សារការងាររបស់ប្រទេសនេះ។

ការវិភាគរបស់ក្រុមហ៊ុន McKinsey & Co បានរកឃើញថា ការជ្រើសរើសបុគ្គលិកបានធ្លាក់ចុះនៅទូទាំងវិស័យជាច្រើន នៅក្នុងប្រទេសអង់គ្លេស ដោយសារនិយោជកកាត់បន្ថយការចំណាយ នៅចំពោះមុខការមានកំណើនសេដ្ឋកិច្ចយឺត និងអត្រាការខ្ចីប្រាក់ខ្ពស់ ដោយចំនួនសរុបនៃការប្រកាសការងារ តាមប្រព័ន្ធអ៊ីនធឺណិត បានធ្លាក់ចុះ ៣១ភាគរយ ក្នុងរយៈពេល ៣ខែដល់ខែឧសភា បើធៀបនឹងរយៈពេលដូចគ្នា ក្នុងឆ្នាំ២០២២។

ប៉ុន្តែបើយោងតាមក្រុមហ៊ុនប្រឹក្សាយោបល់ បានឲ្យដឹងថា វាមានការធ្លាក់ចុះបំផុត សម្រាប់ការងារដែលត្រូវបានគេរំពឹងថា នឹងមានការកែប្រែខ្លាំងដោយសារ AI សម្រាប់តួនាទីបែបនេះ ដូចជាការងារការិយាល័យផ្នែកបច្ចេកវិទ្យា ឬហិរញ្ញវត្ថុជាដើម ដោយបានធ្លាក់ចុះ ៣៨ភាគរយ ពោលគឺស្ទើរតែ ២ដងនៃការធ្លាក់ចុះដែលបានកើតឡើងនៅកន្លែងផ្សេង។

ទីប្រឹក្សាជាន់ខ្ពស់របស់ក្រុមហ៊ុន McKinsey លោកស្រី Tera Allas បាននិយាយថា «ការរំពឹងទុកពីការកើនឡើងដ៏ច្រើននូវផលិតភាពនាពេលអនាគត ទោះបីជាមិនច្បាស់លាស់ក៏ដោយ ជាពិសេសនៅពេលដែលបច្ចេកវិទ្យា និងកម្មវិធីរបស់វា កាន់តែមានភាពល្អប្រសើរ កំពុងជំរុញឲ្យក្រុមហ៊ុនពិនិត្យឡើងវិញនូវយុទ្ធសាស្រ្តកម្លាំងពលកម្មរបស់ពួកគេ និងផ្អាកសកម្មភាពជ្រើសរើសរបស់ពួកគេ»។

ការវិភាគរបស់ក្រុមហ៊ុន McKinsey បានបង្ហាញថា ការងារដែលត្រូវបានចាត់ទុកថា ប៉ះពាល់យ៉ាងខ្លាំងដោយសារ AI ពោលគឺមានន័យថា បច្ចេកវិទ្យាអាចជំនួសយ៉ាងហោចណាស់ការងារពាក់ព័ន្ធមួយចំនួន បានកត់ត្រាការធ្លាក់ចុះខ្លាំងបំផុត នៅក្នុងកន្លែងប្រកាសជ្រើសរើសបុគ្គលិក៕