អ្នកនាំពាក្យក្រសួងការបរទេសអ៊ីរ៉ង់ នៅថ្ងៃចន្ទ (ទី១៤ ខែកក្កដា) នេះ បានឲ្យដឹងថា ប្រទេសអ៊ីរ៉ង់នឹងឆ្លើយតបវិញ ចំពោះការដាក់ទណ្ឌកម្មជាថ្មីរបស់អង្គការសហប្រជាជាតិ (UN) លើកម្មវិធីនុយក្លេអ៊ែររបស់ខ្លួន តែមិនបានបញ្ជាក់លម្អិត អំពីវិធានការអ្វីដែលទីក្រុងតេអេរ៉ង់អាចនឹងមាននោះ។

គួរដឹងថា កាលពីសប្តាហ៍មុន ប្រភពការទូតបារាំងបានសារព័ត៌មាន Reuters ថា មហាអំណាចអឺរ៉ុបនឹងត្រូវស្តារការដាក់ទណ្ឌកម្មរបស់ UN លើអ៊ីរ៉ង់ឡើងវិញ ក្រោមអ្វីដែលគេហៅថា «យន្តការស្ដារឡើងវិញភ្លាមៗ» ប្រសិនបើគ្មានកិច្ចព្រមព្រៀងនុយក្លេអ៊ែរដែលធានាដល់ផលប្រយោជន៍សន្តិសុខអឺរ៉ុប។

«យន្តការស្ដារឡើងវិញភ្លាមៗ» គឺជាដំណើរការមួយដែលនឹងដាក់ទណ្ឌកម្មឡើងវិញរបស់ UN លើទីក្រុងតេអេរ៉ង់ ក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ដែលបានលុបចោលវិធានការនានា ជាថ្នូរនឹងការរឹតបន្តឹងលើកម្មវិធីនុយក្លេអ៊ែររបស់អ៊ីរ៉ង់។

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានប្រាប់សន្និសីទសារព័ត៌មានថា៖ «ការគំរាមប្រើប្រាស់យន្តការស្ដារឡើងវិញភ្លាមៗ ខ្វះមូលដ្ឋានច្បាប់ និងនយោបាយ ហើយនឹងត្រូវបានឆ្លើយតបដោយសមស្រប និងសមាមាត្រពីសាធារណរដ្ឋឥស្លាមអ៊ីរ៉ង់»៕